İordaniya mətbuatı Ermənistanın Azərbaycana qarşı təxribatlarından yazıb

20:43 24.09.2020 Müəllif:Hafta.az
Yazını böyüt
Yazını kiçilt

İordaniyanın www.orobanews.com  və www.nayrouz.com  portallarında Azərbaycanın bu ölkədəki səfirliyinin Ermənistanın təxribatçı hərəkətlərinə və açıqlamalarına dair bəyanatı dərc edilib.

Səfirlikdən hafta.az-a bildiriblər ki, yazıda iyulun 12-16-da Azərbaycan-Ermənistan sərhədində yerləşən Tovuz rayonu istiqamətində Ermənistan silahlı qüvvələrinin təxribat törətdiyi bildirilir. Qeyd olunur ki, Ermənistanın növbəti təxribatı nəticəsində Azərbaycan hərbçiləri və mülki sakin həyatını itirib. Bununla da Ermənistanın işğalçı xarakterini və mülki əhalini hədəfə almaqdan çəkinməyən terrorçu dövlət olduğunu bir daha ortaya qoydu.

Ermənistanın bu təcavüzü təbii ki, beynəlxalq ictimaiyyət tərəfindən kəskin pislənildi. Türk Şurası, İslam Əməkdaşlıq Təşkilatı, Qoşulmama Hərəkatı və digər beynəlxalq təşkilatlar Ermənistanın beynəlxalq rəyi Dağlıq Qarabağ problemindən yayındırmaq, danışıqlar prosesini pozmaq, yeni gərginlik ocağı yaratmaq, üçüncü tərəfləri və üzv olduğu hərbi-siyasi təşkilatları münaqişəyə cəlb etmək cəhdlərinin yolverilməz olduğunu bəyan etdilər.

Bunun ardınca isə Ermənistan Azərbaycana diversiya qrupu göndərdi. Lakin bu cəhd də uğursuzluqla nəticələndi və qrupun komandiri əsir götürüldü. Bütün bunlar işğalçı ölkənin münaqişənin sülh yolu ilə həllində maraqlı olmadığını göstərir.

Ermənistandan fərqli olaraq, Azərbaycan münaqişənin özünün ərazi bütövlüyü, suverenliyi və beynəlxalq səviyyədə tanınmış sərhədləri çərçivəsində, o cümlədən BMT Təhlükəsizlik Şurasının qətnamələri əsasında sülh yolu ilə həllinə sadiqdir. Azərbaycan həm də substantiv danışıqların başlanmasının tərəfdarıdır.

Yazıda qeyd olunur ki, Ermənistan rəhbərliyi və dünya erməniliyi beynəlxalq ictimaiyyəti aldatmaq kimi çirkin xislətindən əl çəkmir. Təcavüzkar ölkə Livan ermənilərini işğal altındakı torpaqlarda qeyri-qanuni şəkildə məskunlaşdırmaqla bölgədə demoqrafik vəziyyəti dəyişməyə cəhd edir. Ermənistanın apardığı qeyri-qanuni məskunlaşdırmanı sübut edən kadrlar da var.

Bəyanatda Azərbaycan-İordaniya münasibətlərinə də toxunulur. Bildirilir ki, Azərbaycan dövləti və xalqı İordaniyanın istər beynəlxalq, istərsə də ikitərəfli müstəvidə Azərbaycanın haqq işinə davamlı dəstəyini yüksək qiymətləndirir.

Sonda Azərbaycan bütün sülhsevər ölkələri və beynəlxalq ictimaiyyəti Ermənistanın hərbi-siyasi rəhbərliyinin yürütdüyü işğalçılıq siyasətini qınamağa, onun əməllərinə hüquqi qiymət verməyə və Ermənistanın səbəbkarı olduğu, Cənubi Qafqaz bölgəsində sülhə və sabitliyə təhdid olan Dağlıq Qarabağ münaqişəsinə son qoymağa çağırır.

Oxunma sayı 1476
Siyasət rubrikasından digər xəbərlər