İraqda etiraz aksiyalarının gedişində 12 nəfər həlak olub, 650 nəfər yaralanıb

16:10 03.10.2019 Müəllif:Hafta.az
Yazını böyüt
Yazını kiçilt

İraqda etiraz aksiyaları zamanı baş verən iğtişaşların gedişində azı 12 nəfər həlak olub, 650 nəfər, o cümlədən 87 polis əməkdaşı yaralanıb.

Bu barədə İnsan Hüquqları üzrə Ali Komissiya məlumat yayıb. Məlumata əsasən həlak olanlardan 11 nümayişçi, biri isə təhlükəsizlik xidmətinin əməkdaşıdır. Hüquq-mühafizə orqanları aksiyalarda iştirak edən 122 fəalı saxlayıb. Onların əksəriyyəti artıq azadlığa buraxılıb.

Bir qədər əvvəl İraqın Baş Naziri Adil Əbd əl-Mehdi etirazlar fonunda ölkənin paytaxtı Bağdadda və bəzi əyalətlərdə bu gün səhər saat 5-dən komendant saatı tətbiq olunduğunu elan edib.

Oktyabrın 1-də Bağdadda etiraz aksiyasının dağıdılması nəticəsində iki nəfər həlak olmuş, 200-dən artıq insan isə yaralanmışdı. Növbəti gün etirazlar təkcə Bağdadı deyil, Zi-Kar, Vasit, Nəcəf, Divaniyə, Babil də daxil olmaqla, bir neçə digər əyaləti də əhatə etmişdi. Aksiya iştirakçıları həyat şəraitinin yaxşılaşdırılmasını, səhiyyə, təhsil sahələrində, əmək bazarında, həmçinin korrupsiya ilə mübarizədə problemlərin həllini tələb edirlər.

Oxunma sayı 53