Zəvvarların Həcc ziyarətinə Binə ticarət mərkəzinin yanından yola salınacaq

15:15 20.10.2011
Yazını böyüt
Yazını kiçilt
HƏcc ziyarətinə avtobusla gedəcək zəvvarların Bakıdan yola salınacağı yeri dəyişdirilib. Bu barədə Azərbaycan Həcc missiyasının təşkilatçısı olan Qafqaz Müsəlmanları İdarəsinin (QMİ) mətbuat xidmətindən məlumat verilib. Məlumatda deyilir ki, bu il ziyarətə avtobusla gedəcək zəvvarlar Bakının Qaradağ rayonunda yerləşən “Binə“ ticarət mərkəzinin yaxınlığındakı meydandan yola düşəcəklər. Zəvvarların Bakıdan yola düşmə yerinin dəyişdirilməsinə isə ənənəvi məkanda - “Azadlıq“ meydanında görülən işlər səbəb olub. Belə ki, hazırda “Azadlıq“ meydanında yeraltı avtomobil dayanacağı tikilir. Qeyd edək ki, azərbaycanlı zəvvarların bir qismi müqəddəs ziyarətə avtobuslarla, bir qismi isə təyyarələrlə yola düşəcək. Ümumilikdə 44 avtobus iki karvan şəklində gedəcək. Oktyabrın 23-ü yola düşəcək ilk karvanda 18 avtobus, oktyabrın 24-ü yola düşəcək ikinci karvanda isə 26 avtobus olacaq.