Moskvada Azərbaycan Mədəniyyət Mərkəzi açılıb

15:15 21.10.2011
Yazını böyüt
Yazını kiçilt

Leyla Əliyeva: “Bu mərkəz yaşına, milliyyətinə baxmayraq, ölkəmizi tanımaq istəyənlərin hamısı üçün maraqlı olacaq“

Moskvada Azərbaycan Mədəniyyət Mərkəzinin təntənəli açılış mərasimi olub. M.İ.Rudomino adına Ümumrusiya Dövlət Xarici Ədəbiyyat Kitabxanasında yerləşən Azərbaycan Mədəniyyət Mərkəzi Heydər Əliyev Fondunun və Azərbaycanın Rusiyadakı səfirliyinin dəstəyi ilə MDB ölkələrində yaradılmış ilk mədəniyyət mərkəzidir. Kitabxana direktorunun beynəlxalq əlaqələr üzrə müavini Svetlana Qoroxova Moskvada Azərbaycan Mədəniyyət Mərkəzinin açılmasını çox mühüm və əlamətdar hadisə adlandırıb: “Bu gün Moskvada Azərbaycan Mədəniyyət Mərkəzi açırıq. Bu, təkcə Moskva deyil, bütün Rusiya üçün mühüm hadisədir. Azərbaycanla bizi çox qədim və uzunmüddətli mədəni əlaqələr bağlayır, mədəni mübadilə sahəsində bizim indiki münasibətlərimiz əladır, gələcək münasibətlərimiz isə daha parlaq olacaq. Mərkəzin yaradılması ideyası Azərbaycanın Rusiyadakı səfirinə və bizim direktor Yekaterina Qeniyevaya məxsusdur. Belə bir müştərək layihə onların təklifidir. Heydər Əliyev Fondu bu təklifi bəyənib, nəticədə mərkəzin yaradılması reallığa çevrilib“.
Heydər Əliyev Fondunun vitse-prezidenti Leyla Əliyeva layihənin həyata keçirilməsinə göstərilən dəstək üçün kitabxananın rəhbərliyinə təşəkkür edib: “Rəmzi haldır ki, Azərbaycan Mədəniyyət Mərkəzi məhz Azərbaycanın müstəqilliyinin 20-ci ildönümü bayram edilən günlərdə açılır. 1991-ci il oktyabrın 18-də dünya xəritəsində yeni suveren dövlət yarandı. Bu 20 ildə Azərbaycan sürətlə inkişaf edib və çiçəklənib. Bu gün biz mədəniyyətlərimizin, xalqlarımızın yaxşılaşması istiqamətində daha bir addım atırıq. Ümid edirəm ki, bu mərkəz yaşından, milliyyətindən asılı olmayaraq bizim ölkəmizin zəngin mədəniyyəti və qədim tarixi ilə daha yaxından tanış olmaq istəyənlərin hamısı üçün maraqlı olacaq. Biz bu mərkəzdə Azərbaycan haqqında kitablar, filmlər, disklər, hər cür informasiya toplamışıq, burada Azərbaycanın böyük yazıçı, şair, rəssam və bəstəkarlarının yaradıcılığı ilə tanış olmaq, ölkəmizin təbiətinin gözəlliklərini, Bakı şəhərinin nadir memarlığını görmək mümkündür. Biz burada yaradıcılıq axşamları, sərgilər, seminarlar maraqlı və məşhur azərbaycanlılarla görüşlər keçirməyi planlaşdırırıq. Əlbəttə, burada Azərbaycan dili, tarixi və ədəbiyyatı dərsləri də keçəcəyik. Bu dərsləri Azərbaycan dilinin daşıyıcıları olan, Bakıdan dəvət edilmiş müəllimlər keçəcəklər. Mən ürəkdən inanıram ki, qonaqlarımızın sayı günbəgün artacaq və bizim qapılar həmişə hamının üzünə açıq olacaq“.
Leyla Əliyeva daha sonra bildirib ki, elə həmin gün kitabxananın foyesində Azərbaycanın və Rusiyanın Əməkdar Rəssamı, Beynəlxalq Sülh Səfiri diplomuna layiq görülmüş Əşrəf Heybətovun “Bakı və bakılılar. 30 ildən sonra“ adlı sərgisi açılıb. L.Əliyeva sərginin bir həftə fəaliyyət göstərəcəyini vurğulayaraq, ümid etdiyini bildirib ki, moskvalıların çoxu həmin sərgiyə baxacaq.
Azərbaycanın Rusiyadakı səfiri Polad Bülbüloğlu Mədəniyyət Mərkəzinin açılışını rəmzi və əlamətdar hadisə adlandıraraq deyib ki, bu 20 ildə ölkənin bütün sahələrində sürətlə inkişaf edib. P.Bülbüloğlu oktyabrın 10-11-də Rusiya və Azərbaycan prezidentlərinin himayəsi altında keçirilmiş Bakı Beynəlxalq Humanitar Forumuna da toxunub: “Biz fəxr edirik ki, Azərbaycan bu məşhur kitab məbədində özünü birinci olaraq xatırladıb. Bu mərkəzin sayəsində təkcə Rusiya və Azərbaycan mütəxəssisləri deyil, iki ölkənin mədəni ictimaiyyəti arasında əlaqələr inkişaf edəcək“.
Açılış mərasimində Arzu Əliyeva, ABŞ, Fransa, Bolqarıstan, Niderland, Yaponiya, Latın Amerikası ölkələrinin mədəniyyət mərkəzlərinin, Avropa Şurasının informasiya ofisinin, gənclərin və Ümumrusiya Azərbaycanlılar Konqresinin nümayəndələri də iştirak ediblər.
Vüsal Tağıbəyli
Oxunma sayı 153