Naxçıvan Muxtar Respublikası
+8-13°
0- 5°
Qazax, Gəncə, Goranboy, Tərtər, Ağdam, Füzuli, Cəbrayıl
+9 -14°
0-5°
Mərkəzi-Aran
+10-15°
+0-5°
Masallı, Yardımlı, Lerik, Lənkəran, Astara
+ 10 -14°
+4-6°
Bakıda və Abşeron yarımadasında
+8 - 13°
+3 - 5°
Əlillər, müharibə veteranları və qadınların rifahını yaxşılaşdıracaq yeni layihə imzalanıb
Tarix: 12.02.2019 | Saat: 15:37:00
Bölmə:Sosial | çapa göndər

Əmək və Əhalinin Sosial Müdafiəsi Nazirliyi, BMT-nin İnkişaf Proqramı fondu, eləcə də Əhali Fondu 3 minə yaxın qadın, əlilliyi olan şəxs və Dağlıq Qarabağ müharibəsinin veteranlarının yaşayış rifahının yaxşılaşdırılması məqsədini daşıyan iki illik proqram imzalayıblar.

BMT-nin Bakı ofisindən hafta.az-a verilən məlumata görə, Azərbaycan Birinci vitse-prezidentinin təşəbbüsü ilə hazırlanmış bu proqram əlilliyi olan şəxslər və müharibə veteranların həyatını yaxşılaşdırmaq üçün əhatəli siyasət irəli sürməyə imkan verəcək. Bu təşəbbüs nəticəsində, əlilliyi olan qadınlar və qızlar, habelə müharibə veteranlarının xüsusi ehtiyacları və potensialları barədə kəmiyyət və keyfiyyət əsaslı məlumatların əlçatanlığı yaxşılaşdırılacaq, əlilliyi olan şəxslərə qarşı qınaq və ayrı-seçkiliyi azaltmaq üçün ictimai düşüncələrin dəyişməsi təşviq ediləcək.

Azərbaycan hökuməti, BMTİP və BMT-nin Əhali Fondu tərəfindən birgə maliyyələşdirilən bu yeni proqram təxminən 1 milyon dollar dəyərindədir və müharibə dövrünün ağır travmalarını yaşamış insanların da daxil olduğu 3 mindək həssas təbəqədən olan insanların fərdi və peşəkar inkişafı, maddi rifahı üçün əlçatan, əhatəli mühitin yaradılmasını təmin edəcək.

Əhalisinin 6 faizindən çoxunu əlilliyi olan insanların təşkil etdiyi bir ölkə olaraq, Azərbaycanda həmçinin 50 mindən artıq insan Dağlıq Qarabağ müharibəsinin ağır nəticələrindən əziyyət çəkərək həm fiziki, həm də mənəvi zərbənin qurbanı olub. Məhz bu insanların həyatını dəyişə biləcək qüvvəsi olan yeni layihənin qarşısında mühüm məsələlər durur. Layihə çərçivəsində müasir informasiya və kommunikasiya texnologiyaları vasitəsilə cəmiyyətin həssas təbəqələri üçün bilik, məlumat və məşğulluq imkanlarını genişləndirmək məqsədilə əlilliyi olan qadınlar və müharibə veteranları üçün Bacarıqların İnkişafı və Təlim üzrə Virtual Laboratoriyanın (V-Laboratoriya) yaradılması nəzərdə tutulur. Əlilliyi olan insanların sosial inteqrasiyası və ümumilikdə cəmiyyətdə inkluzivliyi təşviq etmək məqsədilə Bakıda nümunəvi incəsənət məktəbi yaradılacaq. Burada əlilliyi olan və əlil olmayan qadınlara və müharibə veteranlarına innovasiya, start-up və biznesin inkişafı sahəsində geniş çeşidli platformalar təklif olunacaq. Bundan başqa, əlilliyi olan şəxslərə qarşı stiqmanı aradan qaldırmaq üçün bir sıra maarifləndirmə, təbliğat və ictimai maraqların qorunması kampaniyaları təşkil olunacaq. Ölkənin qərarverici şəxsləri, yüksək səviyyəli məmurlar, millət vəkilləri, işəgötürənlər və yerli icmalar arasında əlilliyi olan şəxslər üçün inkluziv şəraitin, infrastrukturun və imkanların yaradılması, habelə bunu dəstəkləyən siyasətin və ictimai münasibətin əhəmiyyəti aşılanacaq.

Layihə çərçivəsində əlilliyə dair məlumat bazasının yaradılması ilə bağlı mövcud boşluqları aradan qaldırmaq və əlilliyi olan şəxslərə dair cins və yaş qrupu üzrə dezaqreqasiya olunmuş məlumatların daha yaxşı toplanması üçün yeni metodologiyanın hazırlanması nəzərdə tutulur. Məhz bu metodologiyaların daha sonra ölkə üzrə monitorinq və statistik hesabatların hazırlanması zamanı tətbiq edilməsi mexanizmləri müvafiq dövlət qurumlarına çatdırılacaq.

Layihə Bakı şəhəri, Salyan və Masallı rayonlarını əhatə etməklə Ailə, Qadın və Uşaq Problemləri üzrə Dövlət Komitəsi və Dövlət Statistika Komitəsi ilə sıx əməkdaşlıq çərçivəsində icra olunacaq. Proqramın uğurlu icrası üçün yerli hakimiyyət orqanları, dövlət və özəl sektordan olan işəgötürənlər, kütləvi informasiya vasitələri, icmalar və qeyri-hökumət təşkilatları ilə də yaxından əməkdaşlıq edilməsi nəzərdə tutulur. Layihə beynəlxalq inkişaf qurumları və Azərbaycan hökumətinin birgə təşəbbüsü olaraq Dayanıqlı İnkişaf üzrə 2030-cu il Gündəliyinin tələblərinə uyğun həyata keçirilir və bir sıra Dayanıqlı İnkişaf Məqsədinin icrasının sürətləndirilməsinə böyük töhfə verir. Belə ki, 8-ci Qlobal Məqsədə müvafiq olaraq, layihə inklüziv və dayanıqlı iqtisadi artımı, hamı üçün, ö cümlədən əlilliyi olan şəxslər, qadın və kişilər üçün bərabər şəkildə məşğulluğu və layiqli əməyi təşviq edir. 1o-cu Qlobal Məqsəddə göstərildiyi kimi, layihə həmçinin sosial, iqtisadi və siyasi inkluzivliyi təşviq etməklə hər kəs üçün, o cümlədən əlilliyi olan şəxslər və həssas təbəqələr arasında bərabərsizliyin azaldılmasına kömək edəcək. Nəhayət, 17-ci Qlobal Məqsədin çağırışına uyğun olaraq, layihə ölkədaxili bacarıqların gücləndirilməsinə mühüm dəstək göstərəcək və ölkənin statistik məlumat bazasını mütəşəkkil səviyyəyə çatdırmaq üçün əhalinin həssas qruplarına, xüsusilə əlilliyi olan şəxslərə dair olan məlumatların dezaqreqasiya edilməsi, etibarlı və düzgün olmasına da köməklik göstərəcək.



Bölməyə aid digər xəbərlər
Xəbərə şərh yaz
25.04.2019
24.04.2019
23.04.2019