110 min əmlaka mülkiyyət hüququ verilib

15:15 19.10.2011
Yazını böyüt
Yazını kiçilt
Əmlak Məsələləri Dövlət Komitəsində (ƏMDK) bu ilin 9 ayında görülmüş işlər və qarşıda duran vəzifələrə dair müşavirə keçirilib. Komitənin mətbuat xidmətindən verilən məlumatına görə, tədirdə çıxış edən komitə sədri Kərəm Həsənov bildirib ki, 2011-ci ilin 9 ayında dövlət əmlakının qorunub saxlanılması, ondan səmərəli istifadə edilməsi ilə bağlı nizamnamə kapitalında dövlətin payı olan 310-a yaxın səhmdar cəmiyyətindən və idarəetmədə olan 100-ə yaxın dövlət müəssisəsindən balans hesabatları qəbul edilib. Onun sözlərinə görə, ötən 9 ayda dövlət müəssisəsi və təşkilatından 5 900-ə yaxın xüsusi hesabatın alınması təmin edilib. Həmçinin ölkə üzrə kiçik özəlləşdirmə formasında 600-ə yaxın dövlət müəssisə və obyekt, 410-a yaxın obyektin yerləşdiyi torpaq sahəsi özəlləşdirilib. Hesabat dövründə 500-ə yaxın qeyri-yaşayış sahəsi icarəyə verilib. Müqavilə müddəti başa çatmış 600-ə yaxın obyekt üzrə icarə müqaviləsinin müddəti uzadılıb. İcarə haqlarını ödəməyən 500-dən çox qeyri-yaşayış sahəsinin icarəçisinə dövlət büdcəsinə yaranmış icarə haqqı borcunun ödənilməsi tələbi ilə xəbərdarlıq məktubları göndərilib. Yanvar-sentyabr ayları ərzində torpaq sahəsinin icarəyə verilməsi ilə bağlı 300-ə yaxın icarə müqaviləsi bağlanılıb. Müşavirədə qeyd edilib ki, 2011-ci ilin oktyabr ayının 1-dək 6 400-ə yaxın hüquqi şəxs statuslu dövlət müəssisələri və onların 6 000-ə yaxın filiallarının malik olduğu 133 mindən çox daşınmaz əmlakları barədə məlumatlar dövlət əmlakının Registrində qeydiyyata alınıb. Cari ilin yanvar-sentyabr ayları ərzində dövlət əmlakının Registrinə 2 600-dən çox müəssisə və təşkilatdan daşınmaz dövlət əmlakı barəsində baş vermiş dəyişikliklər haqqında Qeydiyyat vərəqələri daxil olub və məlumat bazasına işlənilib. Ötən müddətdə ölkə üzrə 110 minə yaxın daşınmaz əmlak obyekt üzərində mülkiyyət hüquqları qeydiyyata alınıb.

Oxunma sayı 296