Şüvəlanda yeni Gimnaziya açılıb

15:15 20.10.2011
Yazını böyüt
Yazını kiçilt
HeydƏr Əliyev Fondunun prezidenti, Xəzər rayonundan millət vəkili seçilən Mehriban Əliyeva Şüvəlan qəsəbəsində yerləşən Anton Semyonoviç Makarenko adına humanitar fənlər təmayüllü Respublika internat tipli Gimnaziyanın yeni inzibati binasının da açılışında iştirak edib. Gimnaziyanın tədris korpusunun foyesi ilə tanış olan Mehriban Əliyevaya məlumat verilib ki, 1 tədris korpusundan, 2 yataqxana binasından, yeməkxana və yardımçı binalardan ibarət Gimnaziya 1961-ci ildən rus dili təmayüllü internat məktəb kimi fəaliyyətə başlayıb. 2007-ci ildən Təhsil Nazirliyinin əmrinə əsasən Respublika humanitar fənlər təmayüllü internat tipli Gimnaziya adlandırılıb. Uzun illər baxımsız vəziyyətdə olan bu Gimnaziya Heydər Əliyev Fondu tərəfindən əsaslı təmir olunub, 2011/2012-ci dərs ilindən şagirdlərin istifadəsinə verilib. Mehriban Əliyeva tədris korpusunun birinci mərtəbəsində yerləşən sinif otaqlarına, idman və akt zallarına baxdı. 700 yerlik gimnaziyada 38 sinif otağı, multimedia və fənn kabinetləri, 2 kompüter sinfi, kimya, fizika laboratoriyaları, dərslik, dünya ədəbiyyatı, şifahi xalq ədəbiyyatı və müasir dövr ədəbiyyatından ibarət zəngin kitabxana mövcuddur. Sinif otaqları, laboratoriyalar, fənn kabinetləri əyani vəsaitlərlə, müasir avadanlıqlarla təchiz olunaraq şagirdlərin ixtiyarına verilib. Hazırda burada 611 şagird təhsil alır. Onların tədrisi ilə 48 nəfər müəllim və 20 nəfər tərbiyəçi məşğul olur. Dərslər birnövbəlidir. Təhsil Azərbaycan dilində tədris edilir. Gimnaziyanın həyətini gəzən Heydər Əliyev Fondunun prezidenti Mehriban Əliyevaya məlumat verilib ki, gimnaziyanın həyətində süni ot örtüklü futbol, basketbol və voleybol meydançaları, həmçinin müxtəlif idman qurğuları şagirdlərin istifadəsinə verilib. Sonra Gimnaziyanın yataqxana korpusu ilə tanışlıq olub. Mehriban Əliyeva Gimnaziyanın foyesində Prezident İlham Əliyevin təhsil sahəsində apardığı uğurlu siyasətin əks olunduğu foto stendlərə baxıb. Daha sonra şagirdlərin istirahət otaqları ilə tanış olan Mehriban Əliyevanın diqqətinə çatdırılıb ki, k yataqxana binalarında 48 yataq otağı, dərsdənkənar məşğələ otaqları, istirahət, tibb məntəqəsi və hər mərtəbədə 25 nəfərlik televizor otağı var. Hazırda gimnaziyanın yataqxanasından 150 nəfər istifadə edir.
Azad
Oxunma sayı 120