Milli Musiqi Günü metroda qeyd edilib

14:48 18.09.2019 Müəllif:Hafta.az
Yazını böyüt
Yazını kiçilt

18 Sentyabr – Milli Musiqi Gününün Bakı Metropolitenində xüsusi layihələrlə qeyd edilməsinin artıq 5-ci ili tamam olur.

Hafta.az-ın məlumatına görə, sərnişin axınının gur olduğu bir neçə stansiyası hər il bu bayramın ovqatına köklənir. Bu gün də səhər saat 11-dən başlayaraq, günorta saatlarına qədər metronun “İçərişəhər”, “Sahil”, “28 May” və “Elmlər Akademiyası” stansiyaları növbə ilə sərnişinləri canlı musiqi sədaları altında qarşılayıblar.

Metropolitenin çoxsaylı sosial layihələrindən biri olan bu tədbirin proqramına milli və klassik musiqi nümunələri və xüsusən də Üzeyir Hacıbəylinin əsərlərindən parçalar daxil edilib.

Dahi Azərbaycan bəstəkarı Üzeyir Hacıbəylinin doğum günü- 18 sentyabr tarixi Ümummilli lider Heydər Əliyevin təşəbbüsü və 1995-ci ildə imzaladığı Fərmanla Azərbaycanda hər il Milli Musiqi Günü kimi təntənə ilə qeyd olunur.