“Buker“in qalibi açıqlandı

15:15 20.10.2011
Yazını böyüt
Yazını kiçilt
2011-ci il üçün “Buker“ mükafatına “Sonluq hissi“ romanı ilə britaniyalı yazıçı Culian Barns layiq görülüb. Bu müəllifin əsərləri üç dəfə Bukerin “long-list“inə daxil olunsa da, mükafat ona ilk dəfədir təqdim olunur. Təntənəli təqdimetmə dünən Londonun Siti rayonundakı ratuşada baş tutub. Barns münsiflərə “müdrik seçim“ etdikləri üçün təşəkkürlərini çatdırıb və etiraf edib ki, müsabiqədə qazanmaq - lotereyaya bənzəyir, orada hər şey münsiflərin zövqündən aslıdır: “Mən özümü xeyli rahat hiss edirəm. Artıq dördüncü dəfədir ki, bu mükafatı qazanmağa cəhd edirdim və istəmirdim ki, qəbrimin üstə “dörd dəfə “Buker“ə namizəd olub“ yazılsın“. Yazıçı onu da bildirib ki, “Sonluq hissi“ni həyatının əsas romanı hesab etmir. Çünki belə düşünmək onu depressiyaya salardı. “Buker“ mükafatı 1968-ci ildə təsis olunub, hər il ingilis dilində ən yaxşı nəsr əsərinin müəllifinə verilir. Qalib 50 min funt-sterlinq mükafatı əldə edir. Həmçinin qalib də daxil olmaqla bütün finalçılara 2,5 min funtluq çek təqdim olunur. Xatırladaq ki, britaniyalı yazıçının “Sonluq hissi“ romanı 4 məktəbli dostun taleyindən bəhs edir. Onlar daim dost olacaqlarına and içir, itir, sonra yenidən tapılırlar. Dostlardan biri - Toni Uebster həyatının müəyyən mərhələsində keçmişində baş verən hadisələrə dönə-dönə qayıdır. Britaniyalı tənqidçilər romanı psixoloji triller-dram adlandırırlar.

Oxunma sayı 290