“Bakı“ jurnalı Londonda

15:15 29.10.2011
Yazını böyüt
Yazını kiçilt
Londonda “Bakı“ beynəlxalq jurnalının geniş oxucu kütləsi üçün təqdimat mərasimi keçirilib. Tədbirdə Heydər Əliyev Fondunun vitse-prezidenti, “Baku“ jurnalının baş redaktoru Leyla Əliyeva iştirak edib. Bu dəfə Londonun mərkəzində yerləşən və dünyanın ən iri müasir incəsənət qalereyalarından biri olan “The Opera Gallery“ öz qapılarını bütün azərbaycansevərlər, Azərbaycan mədəniyyəti, incəsənəti, adət-ənənələri ilə maraqlananlar üçün açmışdı. “Bakı“ jurnalının geniş oxucu kütləsi üçün keçirilən təqdimat mərasimində Azərbaycanın Böyük Britaniyadakı səfiri Fəxrəddin Qurbanov, Britaniya ictimaiyyətinin nümayəndələri iştirak ediblər.
Tədbirin keçirildiyi “The Opera Gallery“də məşhur rəssamlar Breynvaş və Riç Simmonsun əsərləri sərgilənir. Yeri gəlmişkən, Riç Simmons “Bakı“ jurnalının buraxılışları üçün materiallar üzərində işləyir. “Baku“ jurnalının ingilis dilində versiyasının ilk təqdimatı oktyabrın 4-də Londonun mərkəzi Pikadilli meydanı yaxınlığında yerləşən salonda keçirilib. Lakin budəfəki təqdimat daha çox azərbaycansevərlərin bir araya toplaşmasına səbəb olub. “Vogue“, “Tatler“, “Vanity Fair“ kimi məşhur jurnalların naşiri olan “Cande Nast“ nəşriyyat evində işıqüzü görən “Baku“ artıq ötən müddətdə Londonda və Birləşmiş Krallığın digər şəhərlərində xeyli populyarlaşıb. Britaniyanın, eləcə də dünyanın nüfuzlu “The Telegraph“ qəzeti jurnalın ilk nömrəsinin Britaniya oxucularına təqdim olunmasını xüsusi hadisə kimi xarakterizə edib. Qəzetdə jurnalın baş redaktoru Leyla Əliyevanın sözlərindən sitat da gətirilir. “The Opera Gallery“nin direktoru Jan-David Mala Azərbaycan jurnalistlərinə müsahibəsində deyib: “2007-ci ildən Rusiyada nəşr edilən “Bakı“ jurnalının ingilis dilində versiyası Azərbaycanın və onun paytaxtının bütün dünyada keyfiyyətcə yeni səviyyədə kəşf olunmasında tarixi rol oynayır. Jurnal avropalı oxucunu qədim Odlar Yurdunun zəngin tarixi, mədəniyyəti, incəsənəti, gözəl və müdrik ənənələri, mətbəxi ilə tanış edir, Azərbaycanın müasir inkişafı və beynəlxalq aləmdəki nüfuzlu rolu, ölkədə həyata keçirilən mühüm layihələr barədə məlumatlandırır“.
Azad
Oxunma sayı 839