Vahid elektron ödəmə sistemi sınandı

15:15 19.10.2011
Yazını böyüt
Yazını kiçilt

Nəqliyyatda gedişhaqqı vahid elektron ödəmə kartları ilə ödəniləcək

Bakıda sərnişindaşımada xidmət göstərən nəqliyyat vasitələrində gedişhaqqının elektron formada ödənilməsi istiqamətində işlərə başlanılıb.
Bu barədə Nəqliyyat Nazirliyinin mətbuat xidmətinin rəhbəri Namiq Həsənov məlumat verib. Onun sözlərinə görə, artıq bununla bağlı sınaq yoxlamaları da həyata keçirilib və hər şey uğurlu alınıb. Həmsöhbətimiz vurğuladı ki, nəqliyyatın intellektual idarə edilməsi sistemi layihəsi işə düşəndən sonra Bakıda sərnişindaşıma xidməti göstərən nəqliyyat vasitələrində vahid elektron ödəmə kartları tam şəkildə tətbiq olunacaq. Yalnız bundan sonra avtobusların universal “cip“ kart vasitəsilə ödənilməsinə keçilməsi mümkündür. Kart vasitəsilə ödəniləcək məbləğ sərnişinin getdiyi məsafəyə görə tutulacaq: “Gedişhaqqı bizdə hazırda getdiyin kilometrlə müəyyənləşdirilir. Yeni sistem tətbiq olunduqdan sonra avtobusda xüsusi elektron naviqasiya sistemi vasitəsilə bu müəyyənləşdiriləcək. Sərnişin avtobusdan düşərkən getdiyi məsafənin gedişhaqqı onun kartından tutulacaq“.
Xatırladaq ki, bu sistemin tətbiqi ilə bağlı artıq Koreya şirkəti ilə Nəqliyyat Nazirliyi arasında razılaşma əldə olunub. Onun sözlərinə görə, həmin şirkət bu il sistemi tam şəkildə tətbiq edəcəyi barədə öhdəlik götürüb. Sonrakı illərdə isə yeni ödəmə sisteminin bölgələrdə də tətbiq edilməsi nəzərdə tutulub.

Oxunma sayı 143