Jirinovski “müstəqil Kürdüstan“ın qurulması üçün Qərbdən dəstək istəyib

15:15 19.10.2011
Yazını böyüt
Yazını kiçilt
Rusiya Liberal Demokrat Partiyasının sədri Vladimir Jirinovski Yaxın Şərqdə kürd xalqının müstəqillik qazanmasına kömək etmək üçün Qərb dünyasından dəstək istəyib. “Cihan“ın verdiyi xəbərə görə, Rusiya Dövlət Dumasının spiker müavini Jirinovski bölgənin siyasi xəritəsində kürdlərin müstəqilliyinin ən aktual mövzulardan biri olduğunu deyib: “ABŞ, NATO və Avropa İttifaqı yeni müharibənin qarşısını almaq üçün kürdləri dəstəkləməlidir. İnsan haqları adı altında NATO Liviyaya girdi, indi də gündəmdə Suriya var. Qərb Kosovanı tanıdı. Hərçənd beynəlxalq hüquq baxımından bu qanuni deyildi. Lakin eyni zamanda, Qərb kürdlərin problemlərinə qətiliklə əhəmiyyət vermir. Türkiyə on illərdir onları bombalayır, lakin heç kim bu Yaxın Şərq xalqına sahib çıxmır“. Türkiyə və İranın bölgədə ortaq əməliyyata hazırlaşdığını söyləyən V. Jirinovski vurğulayıb: “Bu vəziyyətdə ABŞ və Avropa ikili standart tətbiq etməli və kürdlərə sahib çıxmalıdır. Kürdlərin hələ də öz dövləti yoxdur. Üstəlik buna baxmayaraq, 40 milyonluq kürdlər Türkiyə, İraq, İran və Suriya, həmçinin başqa ölkələr arasında bölünən torpaqlarda yaşayır. Onların “müstəqil Kürdistan“ı qurmaq uğrunda mübarizəsi artıq on ildən çoxdur davam edir. Türkiyə rəhbərliyi kürdlərə qarşı aqressiv niyyətlərini gizlətmir“. O, məsələ ilə bağlı ABŞ prezidenti Barak Obamaya, NATO-nun baş katibi Anders Fogh Rasmussenə və Avropa Şurasının rəhbəri Heman Van Rompuya məktub göndərib.
Vüsal
Oxunma sayı 239