Günəşlinin dayanacaq problemi

15:15 19.10.2011
Yazını böyüt
Yazını kiçilt

Peyman Ağayev: “Belə dayanacaq kimə lazımdır?“

Paytaxtın Yeni Günəşli qəsəbəsindəki “Q“ yaşayış sahəsi, 4 saylı binanın qarşısındakı avtobus dayanacağının sökülməsi və yerində ticarət obyektinin tikildiyi barədə məlumat vermişik. Artıq həmin ərazidən bir qədər uzaqda yaşıllıqların yaxınlığında yeni dayanacaq quraşdırılıb. Lakin dayanacağın yan və arxa örtük şüşələri qoyulmayıb, oturacaq yoxdur.

“Həftə içi“nin əməkdaşı həmin ünvanda müşahidə apararkən məlum olub ki, ərazidən keçən 264, 278, 275, 309 marşrut avtobusları dayanacaqda saxlamırlar. Səbəbini soruşduqda Nəqliyyat Nazirliyinin həmin marşrutlara nəzarət edən səlahiyyətli nümayəndəsi Peyman Ağayev bunun məsuliyyətini dayanacağı quraşdıranların üzərinə atıb: “Gərək bunu əvvəlcədən fikirləşəydilər. Axı, belə dayanacaq kimə lazımdır? Heç monitor da quraşdırılmayıb“.
Dayanacağın içərisi isə tikinti materiallarının tullantıları ilə doludur. Dispetçerlərin dediyinə görə, bura avtobus dayanacağı deyil. Onun sözlərinə görə, qarşıdakı yolayırıcından da marşrutlar işləyir: “Bəs onlar harada dayansınlar?“
Bu vəziyyət ərazidə yaşayan sakinlər üçün xüsusi problem yaradıb. Sakinlər şikayətlənərək bildirdilər ki, avtobuslar yeni qoyulan dayanacaqda dayanmırlar. Sərnişinlər isə dayanacaqda heç bir şərait olmadığından orada dayanmaq belə istəmirlər.
Görəsən, bu məsələ müvafiq qurumların nümayəndələrini də düşündürürmü? Qarşıdan gələn soyuq qış aylarında küləkli və çovğunlu günlərdə bu dayanacaqda dayanmaq mümkün olacaqmı?
Mövzunu diqqətdə saxlayacağıq.
Qələndər Xaçınçaylı
Oxunma sayı 124