“AzerGold” QSC “Milli KSM-2019” mükafatına layiq görülüb - FOTO

18:20 25.01.2020 Müəllif:Hafta.az
Yazını böyüt
Yazını kiçilt

Azərbaycanın dağ-mədən sahəsində ixtisaslaşan dövlət şirkəti “AzerGold” Qapalı Səhmdar Cəmiyyəti (QSC) “Milli Korporativ Məsuliyyət (KSM)-2019” mükafatına layiq görülüb.

QSC-dən hafta.az-a bildirilib ki, ənənəvi olaraq hər il ölkədə korporativ sosial məsuliyyət siyasətinin təşviqi məqsədilə təşkil olunan müsabiqənin yekun mərhələsinə bu il təqdim edilmiş 60 layihə arasından 7-si vəsiqə qazanıb. “AzerGold”un 2019-cu ildə həyata keçirdiyi layihələrdən biri - Heydər Əliyev Fondunun “Regional İnkişaf” İctimai Birliyi ilə əməkdaşlığı çərçivəsində icra edilmiş “Fərdi aqrar təsərrüfatların iqlim dəyişikliklərinə adaptasiyası” mövzusundakı təlim layihəsi BMT-nin Baş Assambleyası tərəfindən qəbul edilmiş 17 Dayanıqlı İnkişaf Məqsədlərinə daxil olan iqlim dəyişikliyi və onun təsirlərinə qarşı mübarizə məqsədi əsas götürülərək müvafiq nominasiya üzrə seçilib.

Bakı və Naxçıvan Muxtar Respublikasında icra olunan layihə çərçivəsində iqlim dəyişikliklərinə məruz qalan təsərrüfatların effektiv idarə edilməsi üçün 100-dən çox fərdi sahibkara innovativ praktiki biliklər aşılanıb.

Azərbaycanda Qadın Sahibkarlığının İnkişafı Assosiasiyası (AQSİA) və “Proaktiv PR” Agentliyinin birgə təşkil etdiyi müsabiqədə layihələr bir sıra dövlət, özəl və qeyri-hökumət təşkilatlarının nümayəndələrindən ibarət münsiflər heyəti tərəfindən müxtəlif kriteriyalara uyğun olaraq dəyərləndirilib.

Qeyd edək ki, “AzerGold” QSC “Milli KSM mükafatı”na layiq görülən ilk və yeganə dövlət şirkətidir.