ABŞ-da bir liseyin altında 8,7 milyon il əvvələ aid fosillər tapılıb.
Hafta.az-ın “Los Angeles Times”a istinadən yazdığına görə, Kaliforniyanın Los-Anceles şəhərindəki San Pedro Liseyində aparılan təmir işləri zamanı tarixdən əvvəlki canlıların qalıqlarının olduğu iki sahə aşkar edilib.
Bölgə fosillərlə zəngin olduğu üçün 2021-ci ildə başlayan təmir işlərinə Envicom Corporation adlı şirkətin tədqiqatçıları təyin edilib.
Mütəxəssislər 2022-ci ilin iyunundan 2023-cü ilin iyuluna kimi müxtəlif dəniz canlılarının qalıqlarını tapıblar. Long Beach Kaliforniya Dövlət Universitetinin geoloqu Riçard Behl, qalıqların kimyəvi və mineral tərkibini sınaqdan keçirdiklərini söyləyib.
İki il əvvəl təxminən 120 min illik dəniz qabığı tapan tədqiqatçılar bu il daha bir böyük kəşf etdilər: 8,7 milyon illik fosilləri ehtiva edən sümük yatağı üzə çıxıb.
Miosen dövrünə aid sümük yatağının yosunların fosilləşməsi nəticəsində əmələ gələn diatomitlə örtüldüyü müəyyən edilib. Tədqiqatçıların fikrincə, bu, bölgənin yosunlarla zəngin olduğunu və müxtəlif dəniz canlılarından ibarət zəngin ekosistemin inkişafına imkan verdiyini göstərir.
İndiyə qədər yaşamış ən böyük köpək balıqlarından biri olan meqalodon dişləri də məktəbin altında tapılıb.
Digər tapıntılar arasında nəsli kəsilmiş delfin növünün fəqərə və qabırğa sümüyü, nəsli kəsilmiş qılınc dişli qızılbalığın çənə sümüyü və yüzlərlə kiçik balıq fəqərəsi fosili daxildir.
"Bu, keçmiş dövrün bütöv bir ekosistemidir" deyib Envicom Korporasiyasının Mədəni Resurslar üzrə Direktoru Ueyn Bişoff. "Bizdə olan bütün bu sübutlar gələcək tədqiqatçılara 9 milyon il əvvəlin bütün ekologiyasının şəklini birləşdirməyə kömək edəcək" o əlavə edib.
Bişoff deyir ki, dəniz canlısı fosilləri Los-Ancelesin geoloji tarixinin çox hissəsinin su altında qaldığına dair digər sübutları dəstəkləyir.
Los Anceles Təbiət Tarixi Muzeyindən paleontoloq Austin Hendi deyir: “Bu, əsrdə bir dəfə rast gəlinən bir fürsətdir: “Kaliforniyada belə bir qazıntı sahəsi yoxdur”.
Tədqiqatlarını davam etdirən alimlərin digər növləri də aşkar etmələri gözlənilir.
Artıq tapılan fosillərin əksəriyyəti Kaliforniya Dövlət Universitetinə və Los Anceles Təbiət Tarixi Muzeyinə aparılıb. Bunlar üzərində aparılacaq araşdırmalarla milyonlarla il əvvələ aid ekosistem haqqında daha çox təfərrüatların ortaya çıxarılması hədəflənir.
