Təmiz su qıtlığı 2050-ci ilə qədər dünyada təxminən 6 milyard insanı təhdid edir. Xüsusən də Saharaaltı Afrika və Yaxın Şərq ölkələrində ciddi su stressi yaşayacağı gözlənilir. Digər tərəfdən İtaliya, İspaniya və Belçika kimi Avropa ölkələri də yüksək su riskindən əziyyət çəkir. Əhalinin artımı, intensiv resurs istehlakı və su təchizatı, eləcə də iqlim dəyişikliyi ilə kəskinləşən quraqlığın artması səbəbindən vəziyyətin daha da pisləşəcəyi gözlənilir.
Hafta.az-ın yazdığına görə, Dünya Resursları İnstitutu (WRI) tərəfindən bu yaxınlarda dərc edilmiş su qıtlığı riskinin qiymətləndirilməsi hesabatı bir çox ölkəyə ağır yük qoyan misli görünməmiş su böhranını vurğulayır. Yeni məlumatlar göstərir ki, dünya əhalisinin dörddə birinin yaşadığı 25 ölkə hər il çox yüksək su stressi yaşayır. Su qıtlığı su təchizatında kəmiyyət və ya keyfiyyət çatışmazlığı kimi müəyyən edilir. Son on ildə qlobal sudan istifadə əhalinin artım sürətini iki dəfə üstələyib. Bu gün dünya əhalisinin təxminən üçdə ikisi ən azı ildə bir dəfə ciddi su qıtlığı yaşayır və 2,3 milyard insan su problemi olan ölkələrdə yaşayır. Bundan əlavə, dünya əhalisinin 26 faizini təşkil edən iki milyard insanın təhlükəsiz idarə olunan içməli su xidmətlərinə çıxışı yoxdur.
Ərəb ölkələri hazırda şirin suya ehtiyaclarını ödəməkdə ciddi böhranla üzləşirlər. Ətraf Mühit və İnkişaf üzrə Ərəb Forumu (AFED) bildirir ki, ərəb regionu su stresinə ən həssas regionlar sırasındadır. Məhdud bərpa olunan resurslar və mövcud resurslardan həddən artıq istifadəyə görə 18 ərəb ölkəsi su qıtlığı yaşayan ölkələr kateqoriyasına düşüb, 14 ərəb ölkəsi isə dünyada ən çox su qıtlığı olan ölkələr sırasındadır.
İraq və Suriyada son onilliklərin ən ağır quraqlığı milyonlarla insanın həyatını və dolanışıq vasitələrini təhdid edir. İş o yerə çatıb ki, bu yay Dəclə və Fərat çaylarında suyun səviyyəsi rekord həddə düşüb. Bu, kənd təsərrüfatı istehsalının azalmasına, su ilə yoluxan xəstəliklərin artmasına və sakinlərin köçürülməsinə səbəb olub. Vəziyyət bir sıra amillərlə, o cümlədən quraqlıq, iqlim dəyişikliyi, əhalinin artımı və çayda axan suyun həcminə nəzarət edən digər ölkələrlə bağlıdır.
