“Bu il ilk transxəzər yük qatarları Zhejianq əyalətinin Xinhua və Yivu şəhərlərindən, eləcə də Pekin və Şençjendən yola düşüb. Çindən gələn mallar Orta Dəhlizin ən böyük yükdaşıma mənbəyinə çevrilib və onun inkişaf potensialını əhəmiyyətli dərəcədə artırıb. Çindən yola düşən qatarlar Orta Dəhliz boyunca canlı mənzərəyə çevrilib. Çin "Bir kəmər, bir yol" Təşəbbüsü çərçivəsində Azərbaycanla yüksək səviyyəli əməkdaşlığı davam etdirəcək və regional nəqliyyat mərkəzinin yaradılmasında Azərbaycana dəstək olmaq üçün yük daşımaları resursları, texnologiya və kapital sahəsindəki üstünlüklərindən istifadə etməyə hazırdır”.
Hafta.az yazır ki, bunu Çinin ölkəmizdəki səfiri xanım Lu Mey ilin yekunlarına dair keçirdiyi brifinqdə deyib.
Diplomat qeyd edib ki, Çinlə Azərbaycan arasında əməkdaşlıq hər iki ölkənin xalqlarına fayda gətirir. İki ölkənin dövlət başçıları tərəfindən imzalanmış Humanitar Minatəmizləmə sahəsində Əməkdaşlığın Gücləndirilməsi haqqında Anlaşma Memorandumunun icrası çərçivəsində Çin, Azərbaycanın minatəmizləmə potensialını artırmasına və azad edilmiş ərazilərin bərpasına kömək etmək üçün Azərbaycan Mina Təmizləmə Agentliyinə maliyyə yardımı göstərib və yerli sakinlərin təhlükəsizliyini effektiv şəkildə təmin edib. Çin həmçinin Heydər Əliyev Fondu vasitəsilə Bakının Xəzər rayonundakı iki uşaq evinə Çin istehsalı olan elektron avadanlıqlar bağışlayıb və əlilliyi olan Azərbaycan gənclərinin rəqəmsal dövrə daha yaxşı uyğunlaşmasına kömək etmək üçün Çin-Azərbaycan Dostluq Rəqəmsal Auditoriyaları yaradıb.
“Bu ilin noyabr ayında Naxçıvan Muxtar Respublikasında Çin tərəfindən maliyyələşdirilən distant təhsil avadanlıqlarının təhvil-təslim mərasimində də iştirak etdim. Bu layihənin bir hissəsi olaraq Çin Naxçıvandakı 216 məktəbə distant təhsil avadanlıqları təqdim etdi və yerli şagirdlər üçün təlim şəraitini yaxşılaşdırdı. Azərbaycan tərəfi həmçinin Çinin ucqar dağlıq ərazilərində təhsili dəstəkləyir və Yunnan əyalətinin Malipo bölgəsində ikinci ibtidai məktəb üçün oyun meydançasının tikintisinə vəsait ayırıb. Çin tərəfi bunu nəzərə alır. Həyat şəraitinin yaxşılaşdırılmasına yönəlmiş bu layihələr Çin - Azərbaycan dostluğunda təsirli anlardır və bu əməkdaşlığın bəhrələri hər iki ölkənin adi insanlarına, xüsusən də gənc nəslə həqiqətən fayda verəcək, Çin - Azərbaycan dostluğu haqqında ictimai rəyin gücləndirilməsi üçün daha güclü təməl yaradacaq” deyən xanım səfir qeyd edib ki. humanitar mübadilələr iki ölkə arasında ənənəvi dostluğun təməlini möhkəmləndirir. Ölkələr arasında yaxşı münasibətlərin açarı xalqlar arasında yaxınlıqda, xalqlar arasında yaxınlığın açarı isə qarşılıqlı anlaşmadadır. Onun sözlərinə görə, son bir ildə Çinlə Azərbaycan arasında mədəniyyət, təhsil, turizm və digər sahələrdə mübadilələr aktiv və səmərəli olub. Prezident İlham Əliyevin bu ilin aprel ayında Pekinə səfəri zamanı iki dövlət başçısı Çin və Azərbaycan hökumətləri arasında adi pasportlara malik vətəndaşlar üçün qarşılıqlı vizadan imtina haqqında Sazişin imzalanmasının şahidi olublar.
“Vizasız siyasət sayəsində hər iki ölkədən qarşılıqlı turist səfərlərinin sayı artmaqda davam edir. Bu ilin yanvar-oktyabr ayları arasında Azərbaycana gələn çinli turistlərin sayı 57 mini keçib ki, bu da ötən ilin eyni dövrü ilə müqayisədə təxminən 50 faiz artım deməkdir. Azərbaycanlılar, xüsusən də gənclər arasında Çin dilinə və mədəniyyətinə maraq durmadan artır və getdikcə daha çox Azərbaycan universitetləri Çin dili kursları təklif edir. Hər iki ölkədə universitetlər, beyin mərkəzləri, media və mədəniyyət təşkilatları qarşılıqlı səfərlərdə və mübadilələrdə fəal iştirak edir, regional əməkdaşlıq getdikcə daha da yaxınlaşır və hər iki ölkədə həyatın bütün sahələrindən olan insanlar arasında mübadilə platformaları da genişlənir”, - səfir Lu Mey deyib.
Vüsal Tağıbəyli
