Suriyadakı müharibədən qaçaraq 2015-ci ildə Almaniyaya mühacirət edən 29 yaşlı Riyan əl-Şebl ölkənin cənub-qərbində yerləşən Ostelşaym şəhərinin bələdiyyə sədri olub.
Hafta.az-ın "Die Welt"ə istinadən yazdığına görə, Almaniyaya gəldikdən 8 il sonra bələdiyyə sədri olmağı bacaran suriyalı qaçqın 2500 nəfər əhalisi olan Ostelşaymda etibarlı səslərin 55,41 faizini toplaya bilib.
Alman mətbuatında çıxan xəbərlərdə Əl-Şeblin Yaşıllar Partiyasının üzvü olduğu, lakin müstəqil namizəd kimi seçkilərə qatıldığı bildirilib.
Müstəqil rəqibləri Marko Strauss və Mathayas Feyi məğlub etməyi bacaran Əl-Şebl, seçki kampaniyası zamanı təcrübələrinin "çox müsbət" olduğunu söyləyib.
Qeyd edək ki, 2015-ci ildə əhalisinin əksəriyyətini druzların təşkil etdiyi Suriyanın cənubundakı Suveyda şəhərini 21 yaşında tərk edən Riyan əl-Şebl Almaniyaya gəldikdən sonra 7 il Althengstett Bələdiyyəsində çalışıb. O, bələdiyyə sədri seçildikdən sonra yaxınlıqdakı Ostelşaym şəhərinə köçəcəyini bildirib. Əl-Şeblın mandatı iyunun 18-də başlayacaq və 8 il davam edəcək.
Alman mediası 29 yaşlı Əl-Şeblin Almaniyanın cənub-qərbinin ilk suriyalı bələdiyyə başçısı olduğuna diqqət çəkib. Ostelşaymın bağlı olduğu Baden-Vürtemberq əyalətinin bələdiyyə məclisindən verilən məlumata görə, indiyədək bölgədə başqa suriyalı namizədin ortaya çıxmadığı bildirilib.
2015-ci ildə Angela Merkel hökuməti Suriyadakı müharibədən qaçan qaçqınlar üçün açıq qapı siyasəti həyata keçirdi və on minlərlə qaçqın Almaniyaya sığındı.
Almaniyada vətəndaşlıq əldə etmək üçün ölkədə ən azı 8 il yaşamaq lazım olsa da, Suriyalıların əksəriyyəti sıx inteqrasiya səyləri, güclü alman biliyi və öhdəliyi sayəsində daha erkən dövrdə vətəndaşlıq hüququ qazanıb.
Məlumdur ki, suriyalı qaçqınlar orta hesabla 6,5 il ərzində Almaniya pasportu əldə edirlər.
2021-ci ilin mart rəqəmlərinə görə, Almaniyada təxminən 800 min suriyalı var. Bu rəqəm suriyalıları Almaniyada türklər və polyaklardan sonra üçüncü ən böyük xarici icma edir.
Almaniyadakı Suriya əhalisinin əksəriyyəti 2010-cu ildən sonra bu ölkəyə köçmüş insanlardan ibarətdir.
