Almaniyada Sol Partiyadan ayrılan 54 yaşlı parlament üzvü Sahra Vaqenknext tərəfindən elan edilən yeni solçu partiyaya dəstək getdikcə artır.
Hafta.az-ın yazdığına görə, “Bild am Sonntag” qəzetinin ötən həftə keçirdiyi iki sorğuya görə, adı hələ açıqlanmayan partiyaya dəstək 14 faizə çatıb. Şənbə günü sorğunun nəticələrini açıqlayan qəzet, yeni sol partiyanın hansı partiyalardan səs alacağını anlamaq üçün həftə ərzində iki sorğu keçirib. Alman respondentlərin 14 faizi yeni partiyaya səs verəcəklərini bildirsə də, Baş nazir Olaf Şolzun Sosial Demokrat Partiyası yeni partiyadan cəmi bir xal öndə olub və səslərin 15 faizini alıb.
Koalisiya tərəfdaşları olan Yaşıllar və Azad Demokrat Partiyası müvafiq olaraq 12 faiz və 5 faiz dəstək qazanıb.
Yeni partiyanın radikal sağçı AfD-yə səs verən seçicilərdən ən çox səs aldığı müəyyən edilib. Anketlərə görə, 21 faiz olan AfD-dən Vaqenknextin partiyasına 4 ballıq keçid var. Anketlərdə 31 faizlə birinci yerdə görünən Xristian Demokrat Partiyası (CDU) yeni partiyaya 2 faiz səs itirərək 29 faizə düşüb.
AfD kimi, Vaqenknext də hakim koalisiyanı şəhər elitalarına xidmət göstərməkdə və kənd seçicilərinin qayğılarına məhəl qoymamaqda ittihamlayır.
Yeni partiya parlamentdə təmsil olunmayan kiçik partiyalara səs verən seçicilərin də dəstəyini qazanmağı bacarır.
Yeni partiyanın 2024-cü ilin ilk aylarında rəsmi olaraq qurulacağını açıqlayan Vaqenknext bazar ertəsi keçirdiyi mətbuat konfransında partiyasının Saksoniya, Türingiya və Brandenburq regional seçkilərində və qarşıda keçiriləcək Avropa Parlamenti seçkilərində namizədlər irəli sürəcəyini bildirib. Ölkədəki vəziyyətin belə davam edə bilməyəcəyini bildirən alman siyasətçi yeni partiyaya ehtiyac olduğunu “Almanlar yəqin ki, 10 ildən sonra ölkəmizi tanıya bilməyəcəklər” deməklə izah edib.
Vaqenknext bildirib ki, yeni partiya Almaniyanın iqtisadi gücünü qorumaq və eyni zamanda sosial ədalət üçün çalışmaq məqsədi daşıyır.
Olaf Şolz-un Rusiya siyasətini tənqid edən Vaqenknext Berlinin silah tədarükündən çox diplomatiyaya diqqət yetirməli olduğunu deyərək, AB-nin Moskvaya qarşı sanksiyalarını “faydasız” adlandırıb.
Uzun illər Şərqi Almaniya Kommunist Partiyası ilə əlaqəsi olan Sol Partiyanın siması olan Sahra Vaqenknext tərəfindən qurulacaq yeni partiyanın axtardığını tapa bilməyən böyük bir seçici kütləsinə xitab etməsi gözlənilir.
Alman televiziyasında tez-tez müzakirə proqramlarında iştirak edən və uzun müddətdir ölkənin ən məşhur siyasətçilərindən biri hesab edilən Vaqenknext Berlində keçirdiyi mətbuat konfransında "Biz qlobal siyasi böhranlar əsrində yaşayırıq və bu zamanda Almaniya yəqin ki, tarixində ən pis hökumətə sahibdir. Çoxları kimə və nə üçün səs verdiyini bilmir" deyib.
