Hindistanda hökumətə bağlı Mərkəzi Çirklənməyə Nəzarət Şurasının (CPCB) verdiyi açıqlamaya görə, hava çirkliliyi ilə mübarizə aparılan Yeni Dehlidə Hava Keyfiyyəti İndeksi (AQI) 500-dən 400-ə yüksəlib.
Hafta.az-ın yazdığına görə, dumanla örtülmüş paytaxtda havanın çirklənməsi təhlükəli həddə çatdıqdan sonra hökumət tədbirləri gücləndirib. Tədbirlər çərçivəsində şəhərin ibtidai məktəblərində tədris, eləcə də bütün zəruri olmayan tikinti işləri müvəqqəti dayandırılıb.
Paytaxtda benzin və dizellə işləyən avtomobillərin hərəkətinə qadağa qoyulub. Qadağaları pozanlar təxminən 240 dollar cərimələnəcəklər.
Bundan əlavə, dumanı aradan qaldırmaq üçün paytaxtın bəzi yerlərində portativ fəvvarələr və təxminən 45 metr hündürlüyünə su səpə bilən cihazlar quraşdırılıb.
Uzun illərdir ki, Yeni Dehli, xüsusilə qış mövsümündə qonşu ştatların kənd təsərrüfatı sahələrində "küləş yanması" səbəbindən hava keyfiyyətinin ən aşağı olduğu bölgələrdən biridir.
Mütəxəssislər bölgədə havanın çirklənməsinin sağlamlığa zərər verə biləcəyini əsas gətirərək əhaliyə maska taxmağı tövsiyə edib.
Yeni Dehlidə oktyabrın 6-da havanın keyfiyyətinin "aşağı" kateqoriyaya çatdığını elan edərkən "Mərhələli Cavab Fəaliyyət Planının (GRAP)" qüvvəyə minəcəyi gözlənilirdi.
Hindistanda GRAP-a görə, havanın çirklənməsi 4 kateqoriyaya bölünür: “aşağı”, “çox aşağı”, “ağır” və “son dərəcə ağır”. GRAP çərçivəsində “Aşağı” kateqoriyasına 500 kvadratmetrdən çox ərazini əhatə edən tikinti və söküntü sahələrinin bağlanması, iş yerlərinin işçilərinə ictimai nəqliyyat təklif etməyə təşviq edilməsi, nəqliyyatın sıx olduğu ərazilərə yol polisinin yerləşdirilməsi kimi tədbirlər daxildir.
