İndoneziyada məhkəmə bir qadını TikTok videosunda müsəlman namazı qıldıqdan sonra İslamda haram hesab edilən donuz əti yeməklə dini ədavəti qızışdırmaqda təqsirli bilib və iki il həbs cəzasına məhkum edib.
Hafta.az-ın yazdığına görə, Cənubi Sumatra əyalətindəki Palembang məhkəməsinin hakimləri də küfrlə bağlı hökmdə Lina Lutfayavatiyə 250 milyon rupi (16262 dollar) cərimə ödəməsinə qərar verdilər.
Lina Mukherci kimi tanınan və müsəlman olduğunu deyən Lutfayavati, mart ayında yayımlanan və geniş şəkildə izlənilən bir videoda xırtıldayan donuz əti yeməkdən əvvəl "Allahın adı ilə" kimi tərcümə olunan qısa bir dua səsləndirib.
Küfr ittihamı ilə mühakimə olunan qadın ötən ay sosial şəbəkədəki paylaşımında peşman olduğunu bildirib və üzr istəyib. Məlum məhkəmə hökmündən sonra o, yenidən üzr istəyib.
“Mən təəccüblənirəm, dəfələrlə üzr istəmişəm. Əslində, səhv etdiyimi bilirəm, amma cəzanın iki il olacağını gözləmirdim”, - Lutfayavati məhkəmədən sonra deyib.
İndoneziya dünyanın ən böyük müsəlman ölkəsidir və donuz ətinin istehlakı İslamda haram və ya qadağandır.
Amnesty International İndoneziyasının icraçı direktoru Usman Həmid, "Hökumətin ifadə azadlığını qorumaq üçün verdiyi vədlərə baxmayaraq, Lina ilə baş verənlər təəccüblü deyil" deyib. Onun sözlərinə görə, qanunlar dini azlıqları hədəf almaq üçün də istifadə olunub.
2017-ci ildə xristian olan Cakarta qubernatoru Basuki “Ahok” Tjahaja Purnama yenidən seçki kampaniyası zamanı Quran ayəsindən sitat gətirdiyinə görə küfrdə təqsirli bilinərək iki il müddətinə həbs edilib.
2018-ci ildə İndoneziya məhkəməsi səs-küylü məsciddən şikayət edən etnik çinli Meiliana adlı qadını küfrdə ittihamlayaraq 18 ay həbs cəzasına məhkum edib.
