“Forbes Middle East” jurnalı Yaxın Şərqdə Davamlılıq Liderləri siyahısının ilk sayını dərc edib. Siyahıda 2023-cü ildə Yaxın Şərqdə davamlılıq sahəsində öz sözünü demiş liderlər, həmçinin ekoloji, sosial və korporativ idarəetmə prinsiplərinə ən yüksək riayət etmiş və davamlı məqsədlərə doğru müsbət tədbirlər görmüş şirkətlər yer alıb.
Hafta.az-ın yazdığına görə, bu il Birləşmiş Ərəb Əmirlikləri (BƏƏ), “Forbes”in Davamlılıq Liderləri siyahısında yer alan Yaxın Şərqdə ən çox şirkətə sahibdir. Siyahıya BƏƏ-dən 44 şirkət daxil edilib.
İkinci yerdə cəmi 22 şirkətlə Səudiyyə Ərəbistanı Krallığı, üçüncü yerdə 10 şirkətlə Qətər qərarlaşıb. Siyahıya 12 beynəlxalq şirkət, o cümlədən regional qərargahı BƏƏ-də yerləşən 11 şirkət daxil edilib.
Siyahıya həmçinin Misirdən 5, Küveytdən 3, Bəhreyn və Omanın hərəsindən iki şirkət daxil edilib.
“Forbes” jurnalının bu siyahıda yer alan şirkətləri seçərkən 11 əsas sənayedə təsiri də daxil olmaqla, bir qrup faktor əsasında qiymətləndirməyə əsaslanıb. “Forbes” jurnalı həmçinin onların ətraf mühitə müsbət təsirini, ekoloji və sosial idarəetmə prinsiplərinə sadiqliyini, şirkət idarəçiliyinə sadiqliyini, idarəetmədə şəffaflıq və əməkdaşlıq səviyyələrini və ötən il davamlılıq ilə bağlı başladığı təşəbbüsləri qiymətləndirib.
Siyahıya həmçinin Yaxın Şərqdə davamlılıq üzrə görkəmli liderlər də daxil edilib, “Forbes” iqlim dəyişikliyi ilə bağlı problemlərin həllində müsbət və konstruktiv dəyişiklik yaratmaq üçün öz səlahiyyətlərindən istifadə edən 10 ən görkəmli hökumət liderini seçib. Siyahıya BƏƏ-dən Sənaye və Qabaqcıl Texnologiyalar naziri, İqlim Dəyişikliyi üzrə Xüsusi Nümayəndə və Tərəflər Konfransının (COP28) sədri Sultan əl-Cabir başçılıq edir.
Siyahıda həmçinin Əbu-Dabi Ətraf Mühit Agentliyinin baş direktoru Razan Xəlifə əl-Mübarək, İqlim Dəyişikliyi və Ətraf Mühit naziri Məryəm əl-Muhairi və BƏƏ-nin Xarici Ticarət naziri Hamad əl-Zeyudinin də adı var.
Səudiyyə Ərəbistanından isə siyahıya xarici işlər naziri və krallığın iqlim məsələləri üzrə nümayəndəsi Adel əl-Cubeyr və ətraf mühit, su və kənd təsərrüfatı naziri Əbdülrəhman əl-Fadhli də daxil edilib.
Siyahıda həmçinin Bəhreyndən neft və ətraf mühit naziri Məhəmməd bin Mübarək bin Dinah və Misirdən ətraf mühit naziri Yasmin Fuad da yer alıb.
