İran əxlaq polisinin təcridxanasında öldürülən və ölümü uzun müddətdir etirazlara səbəb olan Məhsa Əmininin əmisi təhlükəsizlik qüvvələri tərəfindən həbs edilib.
Hafta.az-ın yazdığına görə, ölkəni silkələyən etiraz hərəkatının yenidən başlanmasından ehtiyatlanan İran idarəçiləri Məhsa Əmininin vəfatının ildönümündə (16 sentyabr) atılacaq hər hansı aksiyanın qarşısını almaq üçün müxalifətə təzyiqlərini gücləndiriblər.
“Reuters”in xəbərinə görə, mənbə “Dünən bir qrup təhlükəsizlik qüvvəsi əməkdaşı Məhsa Əmininin əmisinin evinə gedib. Məhkəmə qərarı olmadan onun avtomobilində və evində axtarış aparıblar, sonra isə özünü saxlayıblar. Onun bəzi sənədlərini, məsələn, pasportunu da müsadirə ediblər. Təhlükəsizlik qüvvələri onu nəzarətə götürməzdən əvvəl bir həftəydi ailəni izləyirdilər. Ailəsi onun hara aparıldığını bilmir” deyib.
İranın məhkəmə sistemi “Reuters”in şərh sorğusuna cavab verməyib.
Aylarla davam edən anti-hökumət etirazları İran hakimiyyəti üçün son illər ən böyük problemə çevrilib və bir çoxları ölkəni qırx ildən artıqdır idarə edən molla rejiminə son qoymağa çağırıb.
Solçu qruplar İran təhlükəsizlik qüvvələri tərəfindən zorakılıqla yatırılan iğtişaşlar zamanı 71-i uşaq olmaqla 500-dən çox insanın öldürüldüyünü, yüzlərlə insanın yaralandığını və minlərlə insanın həbs edildiyini bildirib.
Fransada yerləşən Kürdüstan İnsan Haqları Şəbəkəsinin yaydığı bəyanatda deyilir ki, təhlükəsizlik qüvvələri son bir neçə həftə ərzində etiraz aksiyalarında həlak olan etirazçıların ailə üzvlərinə zəng edərək, hədə-qorxu gəlir, həbs etməklə onlara təzyiqləri gücləndirib.
"Ailələr Əminini anmaq üçün hər hansı proqram təşkil etməkdən çəkinəcəkləri ilə hədələnib", - bəyanatda deyilir.
“Amnesty” təşkilatının ötən ay dərc etdiyi hesabatda belə deyilirdi: “İran hakimiyyəti qurbanların ailə üzvlərini özbaşına həbs edib. Qəbiristanlıqlarda anım mərasimlərinin keçirilməsinə ciddi məhdudiyyətlər qoyulub, qurbanların məzar daşları dağıdılıb”.
İnsan haqları təşkilatları hakimiyyət orqanlarının son bir neçə həftədə baş verən etirazlarda çox sayda jurnalisti, hüquqşünası, fəalı, tələbəni, akademiki, etnik azlıqları, sənətçiləri, ictimai xadimləri və etirazçıların ailə üzvlərini çağırdığını, qorxutduğunu və ya deportasiya etdiyini açıqlayıb.
“İtimad” qəzeti avqustda yazıb ki, Əmini ailəsinin vəkili Saleh Nikbaht da “rejim əleyhinə təbliğat” ittihamı ilə üzləşib. Əgər təqsirli bilinərsə, Nikbahtı bir ildən üç ilədək həbs cəzası gözləyir.
Hakimiyyət İranın əzəli düşmənləri olan ABŞ və İsraili, eləcə də onların yerli agentlərini ölkədə sabitliyi pozmağa yönəlmiş etiraz aksiyalarına qatılmaqda ittihamlayıb.
İran rəsmiləri bir çox təhlükəsizlik əməkdaşının “xarici düşmənlərin dəstəklədiyi üsyançılar və cinayətkarlar” tərəfindən öldürüldüyünü bildirib.
