İraqın neft naziri Hayan Əbdülqəni deyib ki, ölkəsi üç gün ərzində İraq Kürd Regional Rəhbərliyi (KRG) və xarici neft şirkətləri ilə şimaldakı neft yataqlarından xam neft hasilatına yenidən başlamaq üçün razılaşma əldə etməyi gözləyir.
Hafta.az-ın yazdığına görə, Əbdülqəni neft nəqlinin bərpasını müzakirə etmək üçün Ərbilə səfəri zamanı İraqın Türkiyə-İraq boru kəməri ilə KRG-dən neft ixracının bərpası ilə bağlı Türkiyə ilə razılığa gəldiyini də bəyan edib.
Beynəlxalq Ticarət Palatasının Arbitraj Məhkəməsinin Bağdadın lehinə qərar verməsindən sonra Türkiyə martın 25-də iki ölkəni birləşdirən boru kəməri ilə İraqın şimalından gündəlik 450 min barel neft axını dayandırıb.
Məhkəmə Ankaranın 2014-2018-ci illər arasında KRG-nin icazəsiz ixrac etdiyinə görə Bağdada təxminən 1,5 milyard dollar təzminat ödəməsi qərarına gəlib.
Əbdülqəni və yüksək səviyyəli federal neft rəsmiləri KRG Təbii Sərvətlər Nazirliyinin nümayəndələri və yüksək vəzifəli enerji rəsmiləri ilə bu məsələni müzakirə etmək üçün görüşdülər. Ərbildə jurnalistlərə açıqlama verən Əbdülqəni deyib: "Bu görüşün məqsədi neft hasilatının və ixracının bərpasını asanlaşdıracaq bütün problemləri həll etməkdir. İlk addım bölgə və şirkətlərlə öz işini yerinə yetirmək üçün razılığa gəlməkdir”.
İraq hökumətinin neft rəsmiləri Türkiyəyə neft axınının bərpası məsələsini müzakirə etmək üçün ötən çərşənbə KRG Neft Sənayesi Assosiasiyasının (APİKUR) nümayəndələri ilə görüşüb. APIKUR üzvlərinə KRG regionunda neft və qaz müqavilələrində birbaşa və ya dolayı marağı olan beynəlxalq neft və qaz şirkətləri daxildir. Bu şirkətlərin əksəriyyəti boru kəmərlərinin bağlanması səbəbindən hasilatı dayandırmaq məcburiyyətində qalıb.
