Pakistanın Əfqanıstanla əsas sərhəd keçid məntəqəsi dünəndən başlayaraq artıq ikinci gündür ki, bağlanıb və bu, iki ölkənin təhlükəsizlik qüvvələri arasında toqquşmalardan sonra yüklə dolu yük maşınlarının yol boyunca yığılmasına səbəb olub.
Hafta.az-ın “Dunyanewstv”yə istinadən yazdığına görə, gərgin sərhəd keçidi dünən Pakistan və Əfqanıstan Taliban qüvvələrinin bir-birinə atəş açmasından sonra bağlanıb.
Keçidin yerləşdiyi Əfqanıstanın şərqindəki Nanqarhar vilayətində Taliban polisinin sözçüsü Əbdül Bəsir Zabuli bildirib ki, hər iki ölkənin səlahiyyətliləri qarşıdurmanın səbəbini müəyyənləşdirməyə çalışırlar.
Torxam sərhəd məntəqəsi Pakistan və dənizə çıxışı olmayan Əfqanıstan arasında səyahətçilər və məhsulların daşınması üçün əsas tranzit məntəqəsidir.
Pakistan-Əfqanıstan Birgə Ticarət və Sənaye Palatasının direktoru Ziyaul Haq Sərhədi, meyvə-tərəvəz və digər mallarla yüklənmiş yüzlərlə yük maşınının bağlanma səbəbilə tıxacda qaldığını söyləyib. Onun sözlərinə görə, sərhədin bağlanması bütün ticarət axınına təsir edib və Kəraçinin cənub limanında malların yüklənməsi dayandırılıb.
Əfqanıstanla Pakistan arasında 2600 kilometr sərhədlə bağlı mübahisələr onilliklər ərzində bu iki qonşu üçün mübahisə predmeti olub.
Başqa bir hadisədə Pakistan ordusu dünən Əfqanıstan sərhədi yaxınlığındakı Çitral rayonunda baş verən qarşıdurmalarda 4 əsgərin və 12 yaraqlının öldüyünü bildirib.
Pakistan Talibanı və ya Tehrike-Taliban Pakistan (TTP) açıqlamasında bildirib ki, döyüşçüləri son iki gün ərzində bölgədə təhlükəsizlik qüvvələrinə qarşı vuruşub.
Pakistan ordusu Əfqanıstan sərhədi yaxınlığında əsas turizm bölgəsi sayılan dağlıq ərazi olan Çitralda toqquşmalardan sonra Əfqanıstan Taliban hakimiyyətinin ərazilərindən yaraqlıların hücumları üçün istifadəsini dayandırmaq tələblərini təkrarlayıb.
Əfqanıstan Talibanı öz ərazilərinin yaraqlılar tərəfindən istifadə edildiyini inkar edərək, qonşusunun daxilində təhlükəsizlik narahatlığının Pakistan hakimiyyəti üçün daxili məsələ olduğunu deyib.
TTP-nin üzərinə götürdüyü hücumlar son illər Pakistanda artıb. Qrup Əfqanıstan Taliban hərəkatına beyət edib, lakin birbaşa onun bir hissəsi deyil.
