Səudiyyə Ərəbistanı Kralı Salman bin Əbdüləziz dostluq əlaqələrinin və birgə əməkdaşlığın möhkəmləndirilməsi, Səudiyyə Ərəbistanı - Pakistan əlaqələrinin inkişafı sahəsində göstərdiyi səylərə görə Pakistan Hərbi Hava Qüvvələrinin komandanı general Zahir Əhməd Baberə “Fərqli dərəcəli Kral Əbdüləziz medalı” ilə təltif edilməsi barədə göstəriş verib.
Hafta.az-ın yazdığına görə, medalı Pakistan Hərbi Hava Qüvvələrinin komandanına Səudiyyə Ərəbistanının müdafiə naziri şahzadə Xalid bin Salman bin Əbdüləzizin adından Baş Qərargah rəisi general-leytenant Fəyyaz ər-Ruveyli təqdim edib.
Qəbulda iki ölkə arasında müdafiə və hərbi sahədə əməkdaşlıq kimi ikitərəfli əlaqələr, bu əməkdaşlığın inkişaf yolları müzakirə edilib.
Qəbulda Hərbi Hava Qüvvələri komandanı şahzadə general-leytenant Turki bin Bəndər bin Əbdüləziz və Silahlı Qüvvələrin bir çox yüksək rütbəli zabitləri iştirak ediblər.
