ABŞ Müdafiə Nazirliyi (Pentaqon) əsgərlər və federal məmurlar üçün “naməlum uçan obyekt” (UFO) gördükləri təqdirdə məlumat vermək üçün yeni sistem hazırlayıb.
Hafta.az-ın “The Hill”a istinadən yazdığına görə, All Area Anomaly Resolution Office-nin (AARO) direktoru Sean Kirkpatrik açıqlamasında mövcud və ya təqaüdə çıxmış əsgərlərin, federal məmurların və hökumət işçilərinin UFO haqqında məlumat verə biləcəyini söyləyib.
Tətbiq çərçivəsində istifadəçilər UFO hesabatı ilə bağlı fotoşəkilləri və sənədləri onlayn sistem vasitəsilə yükləyib birbaşa AARO-ya göndərə bilərlər.
Kirkpatrik, ABŞ administrasiyasının UFO-larla bağlı həyata keçirdiyi proqramlar haqqında məlumatı olanların da sistem vasitəsilə paylaşa biləcəyini bildirib.
Ötən ilin iyulunda yaradılan AARO-nun direktoru paylaşılan bütün məlumat və sənədlərin məxfi saxlanılacağını, onlara yalnız müvafiq kadrların daxil ola biləcəyini bildirib.
Kirkpatrik, ABŞ-ın keçmişdə UFO-larla bağlı həyata keçirdiyi proqramlarla bağlı bəzi məxfi sənədlərin araşdırıldığını və tezliklə ictimaiyyətlə paylaşılacağını da vurğulayıb.
İyulda ABŞ Konqresində keçirilən sessiyada keçmiş kəşfiyyatçı Devid Qruşun Vaşinqton administrasiyasının UFO-lar və qondarma “naməlum hava hadisələri” (UAP) haqqında məlumatları illərdir gizlətdiyi iddiası gündəmə gəlib. Qruş və iki keçmiş kəşfiyyatçının iştirak etdiyi iclasda ABŞ-ın UFO qalıqlarını topladığı və bu obyektlərdən birində “insanlara aid olmayan üzvi canlı komponentlərin” tapıldığı bildirilsə də, Pentaqon bu iddiaları rədd edib.
