ABŞ Nümayəndələr Palatasının Kəşfiyyat Komitəsinin sədri Mayk Turner “NBC News” televiziyasına bildirib ki, ABŞ Milli Təhlükəsizlik Şurasının kosmosda Rusiya təhlükəsi olduğu iddiasına qarşı mübarizə planı hazırlamağa başlayıb.
Hafta.az-ın yazdığına görə, Turner, “Bunu görən hər kəs mənimlə eyni ifadəni işlədir ki, bu çox ciddi bir təhlükədir. Biz milli təhlükəsizlik müşaviri Cek Sullivanla görüşdük və o, bu problemin həllinə kömək edəcəyinə inandığımız planı təsvir etməyə başladı" deyib.
Konqresmen əlavə edib ki, keçən çərşənbə günü Ağ Evi mümkün təhlükə ilə bağlı məlumatların məxfiliyini ləğv etməyə çağırıb, çünki o, Co Bayden administrasiyasının keçən il Çinin casus şarı məsələsində olduğu kimi, öz hərəkətsizliyini ört-basdır etməyə çalışmasından narahatdır.
Turner daha əvvəl ABŞ-ın ciddi təhlükə ilə üzləşdiyini və prezident Co Baydenin bütün məlumat və sənədləri Konqreslə bölüşməli olduğunu bildirmişdi.
Mövzu ilə bağlı Konqres üzvlərinə göndərdiyi məktubda komitə sədri sözügedən təhlükənin “sabitliyi pozan xarici hərbi potensial”la bağlı olduğunu vurğulayıb.
Amerika mediası Turnerin Rusiya ilə bağlı kəşfiyyat məlumatlarına diqqət çəkdiyini yazıb.
Kremlin sözçüsü Dmitri Peskov cümə axşamı keçirdiyi mətbuat konfransında ABŞ mətbuatında yer alan iddiaların "aldatmaca" olduğunu iddia edib və deyib: "Ağ Ev Konqresi Ukrayna, İsrail və Tayvana pul ayırmağa məcbur etmək üçün hər cür üsuldan istifadə edib. Bu, göz qabağındadır. Ağ Evin hansı hiylələrdən istifadə edəcəyini görəcəyik".
ABŞ prezidenti Co Bayden cümə günü Turnerin peyklərə zərər verə biləcək yeni rus silahından danışdığını təsdiqləsə də, əlavə təfərrüatlar açıqlamayıb.
