Rusiyada iqtisadi artımın uzun müddət 1-2 faiz aralığında olması iqtisadiyyatın yenilənməsi və cəmiyyətin bütövlüyü üçün risk yaradır. Bu xəbərdarlıqla Rusiya Elmlər Akademiyasının Xalq Təsərrüfatının Proqnozlaşdırılması İnstitutunun mütəxəssisləri çıxış ediblər.
Hafta.az-ın yazdığına görə, iqtisadçılar hesab edir ki, inkişaf bir yana qalsın, ölkənin təhlükəsizliyi üçün illik 3-3,5 faiz artım vacibdir. İqtisadçılar təklif edirlər ki, xarici valyuta gəlirlərinin ən azı 15 faizi sosial-iqtisadi layihələrin maliyyələşdirilməsinə cavabdeh olan dövlət qurumu olan VEB.RF tərəfindən buraxılan investisiya istiqrazlarına dəyişdirilməlidir.
İnstitutun iqtisadçılarından Dmitri Belousov Rusiya iqtisadiyyatına mənfi təsir göstərən amillər arasında sanksiyalar, qlobal yavaşlama və mənfi əhali artımı meyllərini qeyd edib. Belousov bildirir ki, bu amillərin təsiri altında 1,5-2 faiz böyüyən iqtisadiyyat minimum səviyyədə belə özünü yeniləmək imkanına malik deyil.
Belousov və həmkarları iddia edirlər ki, Rusiya iqtisadiyyatı tarixin ən böyük sınaqlarından keçir və həll yolu tapılmasa, ölkənin təhlükəsizliyi təhlükə altına düşəcək. İqtisadçılar sanksiyalara görə ixrac gəlirlərinin azaldığını və bunun büdcəyə təzyiqi günü-gündən artırdığını xatırladıblar.
