Voronej Səhmdar Təyyarə İstehsal Şirkəti (VASO, “Rostec” dövlət müəssisəsinin bir hissəsi) tərəfindən yerli istehsal olan Rusiyanın uzaq mənzilli geniş gövdəli sərnişin təyyarəsi İl-96-400M-in prototipi ilk sınaq uçuşunu həyata keçirib.
Hafta.az-ın yazdığına görə, uçuş zamanı təyyarənin dayanıqlığı və idarə oluna bilməsi, bütün sistemlərin işləmə qabiliyyəti, eniş üçün elektrik stansiyası və radiotexnika yoxlanılıb.
İL-96-400M Sovet dövründə istehsalına başlanmış İL-96-300-ün 9,35 metr uzadılmış gövdəsi və daha güclü PS-90A1 mühərrikləri ilə təkmilləşdirilmiş versiyasıdır. Təyyarənin tutumu 370 sərnişini qəbul etmək üçün nəzərdə tutulub. Təyyarələr bir, iki və üçün sinif konfiqurasiyalarda istehsal olunacaq.
Təyyarənin naviqasiya sistemi uçuş və eniş üçün beynəlxalq tələblərə uyğun modernləşdirilib.
Geniş gövdəli təyyarə 8 min kilometrə qədər uça bilir və 400-ə qədər sərnişin daşımaq gücünə malikdir. Bu təyyarə Rusiya hava donanması üçün yeni marşrutlar açacaq və ölkənin bütün regionlarının nəqliyyat əlçatanlığını təmin edəcək, maksimal uçuş məsafəsi 8100 kilometr olacaq.
Bu təyyarə Rusiyanın ən qərb hissəsindəki Kalininqraddan ən şərq hissəsindəki Vladivostoka qədər ölkə boyu sərnişin və yük daşımaq qabiliyyətinə malikdir.
İl-96-400M-in ilk uçuşu 2 min metrə qədər yüksəklikdə, 390 km/saat sürətlə həyata keçirilib və 26 dəqiqə davam edib.
Baş nazirin müavini, sənaye və ticarət naziri Denis Manturov qeyd edib ki, yeni uçuş naviqasiyası və radiotexnika uçuşların təhlükəsizliyini və etibarlılığını artırır, aerodinamik plan, dizayn və sistemlər isə əməliyyat səmərəliliyini təmin edir.
Təyyarə, həmçinin mülki və hərbi yüklərin daşınması üçün istifadə olunacaq.
