Ramazan ayının bu gün başlayacağı İranda yeni ilin başlanğıcı sayılan Novruz martın 20-də qeyd olunacaq. Amma maraqlıdır ki, Ramazanın gəlişi ilə Novruz arasında qısa bir müddət olduğu üçün Ramazan hazırlıqları Novruz alış-verişi və hazırlıqlarının kölgəsində qalıb.
Hafta.az-ın “Şarkul Avsat”a istinadən yazdığına görə, Tehran Bələdiyyəsi Ramazan və Novruzu şəhərin müəyyən yerlərində qoyulmuş bəzi Novruzu xarakterizə edən heykəllərə "aypara" fiquru əlavə edərək birlikdə qarşılayıb.
Əvvəlki illərdə piyadalar üçün yerüstü keçidlərə, reklam lövhələrinə asılan Ramazan bayramını qarşılayan plakatlardan bu il istifadə olunmadığı müşahidə edilib.
Küçələrdə və bazarlarda, xüsusən də Tehranın Qapalı Bazarında nisbətən artan izdihamla rastlaşmaq mümkündür. Qələbəliyin yaranması alış-verişin artması kimi şərh edilsə də, dükan sahibləri bunu “quru kütlə” adlandırırlar. Satıcılar gələnlərin alış-veriş etməməsindən, bazara gələnlər isə qiymətlərin baha olmasından, alıcılıq qabiliyyətinin aşağı düşməsindən şikayətlənirlər.
Supermarketin qarşısında nəqliyyata bağlanan küçədə sərgi açaraq məhsullarını satmağa çalışan küçə satıcıları ilə bələdiyyə polisi arasındakı qovalama digər günlərə nisbətən artıb.
Novruz İranda ən uzun bayram olduğu üçün paytaxt camaatı bu çərşənbədən etibarən istirahət etməyi planlaşdırdıqları yerlərə getməyə başlayacaq.
İki həftə evdən uzaq qalacaq insanlar Ramazan alış-verişinə ehtiyac duymurlar. Dükan və bazarlarda görünən canlılıq ölkənin ən mühüm bayramı olan Novruza doğru bir hərəkətdir.
Supermarketə alış-veriş etməyə gələn Şirin Müzəffəri AA müxbirinə qiymətlərə görə heç nə almadan buranı tərk etmək məcburiyyətində qaldığını deyib. Alış-verişdə məqsədin uşaqlar üçün Novruz bayramı paltarları almaq olduğunu bildirən Müzəffəri xüsusilə uşaq geyimlərinin çox baha olduğunu bildirib.
Müzəffəri onun kimi başqalarının da bazardan əliboş qayıtmaq məcburiyyətində qaldığını, böyüklərin yoxluğu başa düşdüklərini, uşaqların isə “almadım” və ya “pulum yoxdur” sözlərini anlamadıqlarını bildirib.
Ramazan ayı üçün xüsusi hazırlıq görmədiyini deyən Müzəffəri bu ayı daha çox ibadət və əməkdaşlığa diqqət yetirərək keçirəcəyini bildirib.
Alış-verişə gələn Əli Rızazadə Novruz bayramı çərçivəsində 20 gün Tehranda olmayacağını və Ramazana hazırlaşmağa ehtiyac duymadığını bildirib. O, Novruz bayramında ailəlikcə açacaqları “Heft Sin” süfrəsi üçün inqrediyentlər almaq üçün bazara gəldiyini bildirib.
Məryəm Heydəri Ramazan alış-verişi üçün bazara gəldiyini, lakin baha olduğundan almaq istədiyi məhsulların çoxunu ala bilmədiyini bildirib.
Heydəri Ramazan alış-verişində yaşadığı çətinliyin aradan qaldırıla biləcək bir şey olduğunu, ancaq Novruzda uşaqlar üçün hədiyyələr və bayram paltarları almaq məcburiyyətində qaldığını bildirib.
Uşaqların “yox” sözünü eşitmək istəmədiyini deyən Heydəri əlavə edib ki, onlar yeni ilə yeni paltar və ya heç olmasa yeni ayaqqabı ilə girmək istəyirlər.
Heydəri Novruza hələ müəyyən vaxt qaldığını xatırladaraq, bu müddət ərzində uşaqlar üçün nəsə ala biləcəyinə ümid etdiyini bildirib.
