Moskvada bir otaqlı mənziliniz varsa, onu sataraq xaricə nə almaq olar? Son illər ənənə halını alan bu xəbər bu ilin məlumatları ilə bir daha yenilənib.
Hafta.az-ın yazdığına görə, paytaxtda yeni tikili binalarda bir otaqlı mənzilin qiyməti avqust ayında 19 milyon rubla (353 min manat) çatdı. “Forbes” bu büdcə ilə xaricdə, xüsusən də İspaniya, Tailand, Türkiyə, Birləşmiş Ərəb Əmirlikləri və digər ölkələrdə ala bilinəcək daşınmaz əmlaklar barədə məlumat verib.
Tailand, xüsusilə rus investorları arasında populyar yer kimi seçilir. Burada Moskvada bir otaqlı mənzilin qiymətinin 100 min ilə 150 min dollar arasında (167 min-253 min manat) bir çox variantını tapmaq mümkündür. Məsələn, Pattayada 111 min dollara (təxminən 10 milyon rubl) 28 kvadratmetrlik bir studiya mənzil almaq olar. Fuketdə okean mənzərəsi olan 37 kvadratmetrlik mənzil 176 min dollara (15,9 milyon rubl) başa gələ bilər.
İspaniyada Moskvada bir otaqlı mənzilin qiymətinə mənzil almaq mümkündür, lakin bu, daha çox bölgədən və evin yerindən asılıdır. Madrid, Kosta Blanka və Kosta del Sol kimi məşhur bölgələrdə daşınmaz əmlak qiymətləri son bir ildə 20 faiz artıb. Bu büdcə ilə sahildən uzaqda daha az populyar ərazilərdə təvazökar mənzil tapmaq mümkündür. Məsələn, Almeriya və Mursiyada iqtisadi sinif mənzil almaq olar.
Dubay son illər rus alıcılar arasında populyarlığını artırıb. Ancaq burada da daşınmaz əmlakın qiyməti son iki ildə 20-30 faiz artıb. Buna baxmayaraq Moskvada evini satan şəxs Dubayda 30 kvadratmetrlik studio mənzil ala bilər. Dubaydan kənarda Ras əl-Xeymə kimi digər əmirliklərdə daha böyük mənzillər tapmaq mümkündür.
Kiprdə daşınmaz əmlak qiymətləri son vaxtlar artıb və orta alış dəyəri 300 min avro (30 milyon rubl) civarındadır. Buna görə də, Moskvada mənzillər üçün əlverişli variantları tapmaq çətin ola bilər. Bununla belə, Larnaka kimi şəhərlərdə büdcəsi 200 min avroya qədər olan kiçik mənzillər tapmaq olar.
Türkiyə xüsusilə İstanbul və tətil bölgələrində geniş seçim təklif edir. İstanbulun bəzi yerlərində (Arnavutköy, Küçükçəkməcə) Moskvadada satılan mənzilin qiymətinə 50-60 kvadratmetrlik mənzil almaq olar. Antalyada 19 milyon rubl büdcə ilə 55-75 kvadratmetr dəniz mənzərəli mənzillər tapmaq mümkündür.
Yunanıstan son 3 ildə daşınmaz əmlak qiymətlərinin 42 faiz artdığı ölkə olsa da, Moskvada mənzilin qiyməti üçün əlverişli variantları təklif edir. Afinada 80 min avrodan başlayan qiymətlərlə rahat mənzillər tapmaq mümkündür. 19 milyon rubl büdcə ilə Afinanın mərkəzi və ya cənub/şimal bölgələrində 50-70 kvadratmetrlik ikinci əl evlər almaq olar.
