Vladivostokda KXDR vətəndaşları Şimali Koreya konsulluğuna baş çəkdikdən sonra yoxa çıxıblar, RİA Novosti PrimPoisk axtarış təşkilatına istinadən xəbər verir.
“İnsanlar getdi! 43 yaşlı Kim Kum Soon və 15 yaşlı Park Kwon Joo. Vladivostok şəhəri... 2023-cü il iyunun 4-də onlar KXDR-in Baş Konsulluğunun ərazisini tərk ediblər... indiyədək onların harada olması məlum deyil”, - deyə təşkilatdan bildirilib.
SHOT Telegram kanalının məlumatına görə, söhbət xüsusilə Şimali Koreyanın baş konsulunun həyat yoldaşı və oğlundan gedir. O da məlumdur ki, hüquq-mühafizə orqanları artıq vəziyyəti araşdırır. Qeyd olunur ki, təşkilat insanların axtarışı ilə bağlı mesajı öz səhifələrindən silib.
Bundan əvvəl KXDR-in Rusiya ilə sərhədində baryerlərin inşası barədə məlumat yayılmışdı. Bildirilir ki, 2020-ci ildə COVID-19 pandemiyasının başlamasından sonra Şimali Koreya hakimiyyəti Rusiya və Çinlə sərhəddə irimiqyaslı istehkamlar tikməyə başlayıb.
