Çin Dövlət Şurasının sədri Si Cinping üçüncü 5 illik müddətə seçildikdən sonra ilk çıxışında ordunu "Polad divar"a çevirəcəyini vəd edib. Ümumçin Xalq Nümayəndələri Konqresində 3 min nümayəndədən ibarət auditoriya qarşısında çıxış edən lider deyib ki, təhlükəsizlik inkişafın əsasıdır və sabitlik rifahın ilkin şərtidir.
Hafta.az-ın İndependent-ə istinadən yazdığına görə, cənab Cinping hərbçiləri milli suverenliyi, təhlükəsizliyi və inkişaf maraqlarını effektiv şəkildə qoruyan Çinin "Polad Böyük Səddinə" çevirəcəyini deyib.
Sələfi Mao Zedongdan sonra Çində ikinci güclü lider sayılan Cinping, həm də ölkənin elm və texnologiya sahəsində özünü təminetmə səviyyəsinin daha yüksək səviyyəsinə çatmalı olduğunu söyləyib. Pekin uzun müddətdir ki, bunu hədəfləyir, lakin Qərblə, xüsusən də ABŞ-la texnologiya və təhlükəsizlik sahəsində əlaqələrin zəifləməsi bu məqsədi daha da aktuallaşdırıb.
Etibarlı müttəfiqlərini yüksək səviyyəli təhlükəsizlik postlarına gətirən Cinpingin növbəti addımda təhlükəsizlik məsələləri ilə bağlı partiya nəzarətini gücləndirəcəyi gözlənilir. O, keçən həftə hökumət müşavirləri ilə qapalı görüşdə ABŞ-ın rəhbərlik etdiyi Qərbin "Çini sıxışdırmaq üçün çoxsaylı məhdudiyyətlər tətbiq etdiyini" söyləyib.
Çıxışında Çinin "müstəqillik tərəfdarı" təsirlərə, separatçı fəaliyyətlərə və xarici müdaxiləyə qarşı çıxması lazım olduğunu vurğulayan Cinping Pekinin özünü idarə edən Tayvanı yaramaz bir əyalət kimi gördüyünü söyləyib. O, milli birləşmənin milli gəncləşmənin özəyi olduğunu ifadə edərək, Tayvanın Çinlə əlaqələrinin yeni prezidentlik müddətinin əsas məqamlarından biri olacağına diqqət çəkib.
Bu arada, Çinin yeni baş naziri Li Çianq çıxışında biznes mühitinin yaxşılaşacağını və bütün şirkətlərə bərabər münasibət göstəriləcəyini deyərək biznes ictimaiyyətinə etimad yaratmağa çalışıb. Li həftə sonu Çin Kommunist Partiyasında ikinci ən güclü mövqeyə gətirilib və ona üç illik Covid-19 məhdudiyyətlərindən sonra dünyanın ikinci ən böyük iqtisadiyyatını canlandırmaq tapşırıldı.
Baş nazir deyib: "İqtisadiyyatın inkişafı iş yerlərinin yaradılması üçün əsas həll yoludur.
Özəl sahibkarlar və ya bizneslər daha yaxşı mühitdən və inkişaf üçün daha geniş imkanlardan istifadə edəcəklər... Biz bazarda bütün növ subyektlər üçün bərabər oyun sahəsi yaradacağıq, özəl sahibkarların böyüməsini və inkişafını dəstəkləmək üçün daha çox işlər görəcəyik".
İllik parlament iclasının açılışında Çin iqtisadiyyatın cəmi 3 faiz böyüdüyü keçən ildən sonra təxminən 30 ilin ən aşağı hədəfi olan 5 faiz ətrafında ÜDM artımı hədəfi qoyub. Çinin bu il bir çox problemlə üzləşə biləcəyi üçün bu hədəfə çatmağın asan olmayacağını deyən Linin 90 dəqiqəlik çıxışı, sələfi Li Keqyanqın son illərdə etdiyi çıxışlardan xeyli qısa idi.
Bazar ertəsi də Çin parlamenti fövqəladə hallar haqqında qanunları daha tez qəbul etməyə imkan verən qanuna dəyişiklikləri təsdiqləyib. Dövlətə məxsus “Şinhua” xəbər agentliyi bildirib ki, qanunların necə qəbul edildiyini tənzimləyən Qanunvericilik Aktına edilən düzəliş, Ümumçin Xalq Nümayəndələri Konqresinin 170 üzvdən ibarət Daimi Komitəsinə qanunları ilk oxunuşdandan sonra qəbul etmək üçün xüsusi səlahiyyətlər verir.
İllik assambleya iclası zamanı açıqlanan nümayəndə yığıncaqlarından alınan sənədlərdə deyilir ki, bu addım qanunvericiliyin keyfiyyətini və səmərəliliyini daha da yaxşılaşdırmaq üçün vacibdir və “kommunistlərin ümumi rəhbərliyini gücləndirmək üçün qaçılmaz zərurətdir.
