13 minə qədər hazırkı və keçmiş belaruslu hərbçi Ukraynaya qarşı müharibədə iştirak etmək üçün müqavilə imzalayıb.
Hafta.az “UNİAN”a istinadla xəbər verir ki, bu barədə Ukrayna Silahlı Qüvvələri Baş Qərargahının Baş Əməliyyat İdarəsinin rəis müavini Aleksey Qromov brifinq zamanı bildirib.
Onun sözlərinə görə, Rusiya Belarusu genişmiqyaslı müharibəyə cəlb etmək cəhdini davam etdirir.
"Belarus Silahlı Qüvvələrinin 6 batalyonu Ukraynanın dövlət sərhədi boyunca yerləşdirilib və Ukrayna ilə həmsərhəd ərazilərdə tapşırıqları yerinə yetirir. Ümumiyyətlə, mövcud məlumatlara görə, Rusiya Belarusu Ukraynaya qarşı genişmiqyaslı müharibəyə cəlb etmək cəhdində davam edir. İlkin məlumatlara görə, Belarus xüsusi əməliyyat qüvvələrinin, eləcə də "OMON"-un hazırkı və keçmiş hərbi hissələri arasından 13 minə qədər adam Ukraynaya qarşı müharibədə iştirak etmək üçün saziş imzalayıb”, - Qromov bildirib.
O izah edib ki, belaruslar üçün əsas motivasiya müharibədə iştiraka görə maddi mükafatdır, çünki "işğalçıların hərəkətlərində heç bir ideoloji əsas yoxdur və heç kim denasifikasiyaya inanmır".
"UNİAN"-ın daha əvvəl xəbər verdiyi kimi, Rusiya lideri Vladimir Putin özünü Belarus prezidenti Lukaşenkonu müharibəyə qoşulmağa məcbur etmək üçün ona təzyiqləri artırıb.
