Dünyanın baş bəlasına çevrilmiş Rusiya-Ukrayna müharibəsi həll olunmadıqca, beynəlxalq ictimaiyyətin narahatlığı da artır. Son illər ABŞ prezidenti Donald Trampın xüsusi səyləri də bu lazımsız müharibəni dayandırmağa kömək etmir və Rusiya Ukraynaya qarşı işğalçı müharibəsini daha da alovlandırmaqdadır.
Hafta.az-ın yazdığına görə, bir çox beynəlxalq ekspertlər Qazaxıstanın Rusiya ilə Ukrayna aarsında vasitəçi ola biləcəyini gündəmə gətirməkdədir. Qazaxıstanlı politoloq Rizzat Tasim bununla bağlı öz fikirlərini bölüşərkən deyib ki, belə bir mövzuya son dərəcə ehtiyatla və həddindən artıq tələsmədən yanaşmaq lazımdır.
"İşləri tələsdirməyə ehtiyac yoxdur. Prezident Kasım-Jomard Tokayev dəfələrlə vurğulayıb ki, Qazaxıstan zəruri hallarda vasitəçi və ya üçüncü tərəf kimi çıxış etməyə hazırdır. Lakin beynəlxalq münasibətlərdə hər bir dövlətin gərginləşmiş münaqişədə vasitəçi və ya arbitr kimi çıxış etməyə qadir olmadığını qəbullanmaq lazımdır. Birinci şərt hər iki tərəfin belə bir vasitəçilik missiyasını qəbul etməsidir. İkinci şərt hər iki tərəfə qarşı balanslı siyasət yürüdülməlidir. Üçüncü şərt heç bir şəxsi maraqların olmamasıdır; yeganə maraq sülhə can atmaq olmalıdır", - deyə Rizzat Tasim vurğulayıb.
Ekspertin fikrincə, dünyada bu prinsiplərə cavab verə biləcək çox az ölkə var.
“Əvvəllər Ukrayna Səudiyyə Ərəbistanı kimi bir neçə ölkənin, Rusiya da öz növbəsində Macarıstanın adını çəkirdi. Belarus da oxşar addımlar atmağa çalışdı: Lukaşenko ABŞ ilə Rusiya arasında vasitəçilik etməyə çalışdı. Lakin Minsk Vaşinqtona “Belarusa qarşı sanksiyaları ləğv edin, sonra bu rolu tam yerinə yetirə biləcəyik” dedikdə, bu, ölkənin Ukraynada sülhə nail olmaqda heç bir real marağının olmadığını göstərdi. Bundan sonra Belarus faktiki olaraq prosesdən çıxdı. Qazaxıstana gəldikdə isə, ABŞ, Rusiya və Ukrayna ilə belə bir missiyanı yerinə yetirə biləcəyinə ümid artır”, - deyə politoloq qeyd edib.
