Rusiyanın ən yaxın iki müttəfiqi Belarus və İran müdafiə sahəsi də daxil olmaqla, ikitərəfli münasibətlərin əsas sahələrdə gücləndirilməsinə yönəlmiş sazişlər imzaladıqlarını açıqlayıb. Minskdə görüşən Belarus prezidenti Aleksandr Lukaşenko ilə İran prezidenti Məsud Pezeşkian 13 fərqli müqavilə imzalayıb.
Hafta.az-ın yazdığına görə, danışıqlar rəsmi olaraq ticarət, investisiya, sənaye layihələri, elm və təhsil sahələrində əməkdaşlıq, həmçinin Avrasiya İqtisadi İttifaqı və Şanxay Əməkdaşlıq Təşkilatından tutmuş BRİCS və BMT kimi çoxtərəfli təşkilatlarla koordinasiyaya yönəlib.
Lakin tərəflər müdafiə sektorunda necə əməkdaşlıq edəcəkləri ilə bağlı təfərrüatları bölüşməyiblər. Ukrayna Xarici Kəşfiyyat Xidmətinin bu gün yaydığı bəyanata görə, İran İsraillə son gərginlik zamanı zədələnmiş hava hücumundan müdafiə və elektron döyüş sistemlərinin təmiri üçün Belarusdan kömək istəyir. Bəyanatda vurğulanıb ki, Tehranı narahat edən əsas məsələ İsraillə son müharibədə ciddi zədələnmiş hava hücumundan müdafiə sistemləri və elektron döyüş avadanlıqlarının təmiri ehtimalıdır.
Bəyanatda Belarusun Rusiyadan fərqli olaraq hərbi-texniki sahədə sanksiyalardan daha az sıxıldığı qeyd edilib və Belarusun İranın müdafiə qabiliyyətinin canlandırılması üçün kanala çevrilə biləcəyi barədə xəbərdarlıq olunub.
Bəyanatda həmçinin Tehranın kəskin elektrik enerjisi istehsalı və kənd təsərrüfatı texnikası çatışmazlığını həll etməkdə maraqlı olduğu vurğulanıb və əlavə olunub: "Minsk üçün bu, rəsmi elan edilən məsələlərdən çox kənara çıxan layihələrdə iştirak imkanı deməkdir. İran sanksiyalara məruz qalan mallara çıxış üçün Belarusdan başqa bir kanal kimi istifadə etməyi planlaşdırır".
Rusiya prezidenti Vladimir Putinin ən yaxın müttəfiqlərindən olan Belarus lideri Lukaşenko ölkəsini Rusiyanın 2022-ci il fevralın 24-dən etibarən Rusiyanın Ukraynaya qarşı həyata keçirdiyi hərtərəfli işğal və hücumlar üçün baza kimi Rusiyaya açdı. Daha sonra Belarus da Rusiyanın taktiki nüvə raketlərinin yerləşdirilməsinə icazə verdi. İran həmçinin Rusiyaya döyüşdə istifadə üçün “Şahid” tipli silahlı pilotsuz uçuş aparatları verib. İran prezidenti Pezeşkian yanvarda Putinlə strateji əməkdaşlıq sazişi imzalayıb. Bununla belə, müqavilədə qarşılıqlı müdafiə bəndinin olmadığı bildirilir.
