Bir müddətdir sosial şəbəkələrdə İranda mollaların çalmalarının yerə atılması ilə bağlı aksiyalar paylaşılır.
Sentyabrın 13-də başını düzgün örtmədiyi səbəbilə əxlaq polisi tərəfindən saxlanılan 22 yaşlı Məhsa Əmininin ölümündən sonra İranda etirazlar ikinci ayına yaxınlaşır. İranda nümayişlərdə hicablarını çıxaran qadınlar və gənclərin küçələrində rastlaşdıqları mollalar “Qadınlara həyat, azadlıq” şüarı ilə nümayişlərin simvoluna çevrilən çalmalarını yerə atırlar.
Yolda gördükləri mollaların çalmalarını yerə ataraq bu anları mobil telefonlarına lentə alan fəalların bu hərəkəti qısa zamanda trendə çevrilib. TikTok, İnstaqram və Twitter kimi bir çox sosial media platformalarında gənclərin mollaların çalmalarını atması videoları paylaşılır. Gənclər arasında bu aksiya İrandakı dini rejimə istinad edilərək devrilmə mesajı kimi qəbul edilir. Ekspertlər bu fikirdədirlər ki, kişilərlə yanaşı qadınların da fəal iştirak etdiyi nümayişlərdə “hamı üçün azadlıq”ın vurğulanması ölkədəki müxtəlif etnik və dini qrupları İran administrasiyasına və onun simvollarına qarşı birgə hərəkət etməyə sövq edib. Onlar inidiki quruluşu zülmkar bir rejim kimi görürlər.
Digər diqqətçəkən amil isə çoxlu sayda ölü və məhbus olmasına baxmayaraq etiraz nümayişlərinin davam etməsidir. Beynəlxalq insan haqları təşkilatlarının məlumatına görə, etirazlarda ölənlərin sayı 300-ü keçdiyi halda, təxminən 15 min adamın həbsdə olduğu bildirilir.
Bildirilir ki, əsasən mühafizəkar olan İranda 290 yerlik parlamentdə 227 deputat həbsdə olan bəzi nümayişçilərə edam cəzası verilməsinə qərar verib. İranın baş hakimi Qulam Hüseyn Möhseni-Ejei Ali Məhkəmə Şurasının iclasında parlamentin onun tələbini qəbul etdiyini və bəzi etirazçıların qisas prinsipi və ya qisas qanunu əsasında edam oluna biləcəyini bildirib. İranda nümayişlərdə saxlanılan 15 min nəfərin olduğu bildirilir.
