Moskva ilə Sankt-Peterburq arasında yeni sürətli dəmir yolu xəttinin tikintisi üçün prezident Vladimir Putinin razılığı ilə rəsmi təşəbbüslər başlayıb. Rusiya lideri Sankt-Peterburqda ona təqdim olunan “ən sürətli qatar” layihəsinə hərtərəfli dəstək verib.
Hafta.az-ın Rusiya KİV-nə istinadən yazdığına görə, yeni xəttin tikintisindən sonra iki şəhər arasında sürətli qatarların hərəkət müddəti daha da qısalaraq 2 saat 15 dəqiqəyə enəcək.
Hazırda iki şəhər arasında məsafə Rusiyanın ən sürətli qatarı olan “Sapsan”la 4 saata qətt edilir.
Tikintisinin dəyəri 610 milyard rubl (6,6 milyard dollar) olan layihənin altı bölgədən keçəcəyi və qatarların Yaponiyadakı “Shinkansen” sürətli qatarları kimi hər 10-15 dəqiqədən bir yola salınmasının planlaşdırıldığı bildirilir.
Layihənin nə vaxt həyata keçiriləcəyi hələlik bəlli deyil. Nəqliyyat naziri Vitali Savelyev bildirib ki, ilk 28 qatarın 2028-ci ildə yüksək sürətli qatar xidmətinə çatdırılması planlaşdırılır.
Hazırda “Sapsan” qatarında bir tərəfə biletin qiyməti ekonom kateqoriyada 2700 - 6 min rubl aralığında dəyişir.
