"International Journal of Geriatric Psychiatry"də dərc olunan araşdırmaya görə, Exeter Universitetinin alimləri musiqi ilə məşğul olan və musiqi ilə məşğul olmayan insanların beyinlərinin necə yaşlandığını araşdırıblar.
Hafta.az-ın yazdığına görə, araşdırmada 40-68 yaş arası 1100-dən çox insan üzərində alət çalmağın, mahnı oxumağın, not oxumağın, musiqi dinləmənin və musiqi istedadının insan beyninə təsiri araşdırılıb.
Tədqiqatçılar həyatlarında musiqi ilə məşğul olmuş və heç vaxt musiqi ilə maraqlanmayan insanların idrak məlumatlarını müqayisə ediblər. Nəticələr göstərib ki, piano və ya orqan çalan insanlar musiqi ilə məşğul olmaqdan daha çox faydalanırlar, lakin sadəcə musiqi dinləmək idrak sağlamlığına eyni təsir göstərmir.
Araşdırma, musiqi ilə məşğul olmağın yaddaşı güclü tutaraq sonrakı yaşlarda beyin sağlamlığını qorumağa kömək etdiyini və mütəmadi olaraq notlar oxuyan insanların daha yaxşı rəqəmsal yaddaşa sahib olduğunu ortaya qoyub.
Araşdırmanın aparıcı müəllifi professor Anne Korbet açıqlamasında bu araşdırma üçün çox həssas testlər tətbiq etdiklərini, insanların müxtəlif beyin funksiyalarının araşdırıldığını və musiqinin buna təsirinin də araşdırıldığını bildirib.
Xüsusilə alətlərdə çalmağın beyinə böyük təsirləri olduğunu vurğulayan Korbet, "Araşdırma insanların demans riskinin necə aktiv şəkildə azala biləcəyini və musiqinin burada rol oynadığını göstərir" deyib.
İngiltərədə "Dementia UK" adlı təşkilat da araşdırmanın nəticələrinin demans xəstələrinə müsbət təsir göstərdiyini və bu xəstələrin musiqidən ünsiyyət vasitəsi kimi istifadə etdiyini bildirib.
