ABŞ Venesuelada neft və enerji ehtiyatlarını qorumaq üçün muzdlu şirkətlərlə müqavilə bağlamağı düşünür.
Hafta.az yazır ki, CNN-ə anonimlik şərti ilə danışan mənbələr, ABŞ prezidenti Donald Trampın uzun müddət Venesuelaya Amerika qoşunlarını yerləşdirməkdə tərəddüd etdiyiyini deyib.
Böyük neft şirkətlərini Venesuelaya yenidən investisiya qoymağa inandırmaq üçün lobbiçilik edən administrasiya lazımi təhlükəsizlik zəmanətlərini təmin etmək üçün muzdlu şirkətlərlə müqavilə bağlaya bilər.
Mənbələrə görə, bir çox özəl təhlükəsizlik şirkətləri artıq Venesueladakı ABŞ aktivlərini qorumaq vəzifəsini öz üzərinə götürmək üçün rəqabətə başlayıb.
Həmçinin bildirilir ki, ABŞ-ın Venesueladakı səfirliyi yenidən açılacağı təqdirdə təhlükəsizliyi təmin etmək üçün muzdlu şirkətlər ABŞ Dövlət Departamenti ilə əlaqə saxlayıb.
Tramp administrasiyasının müqavilə bağlamağı düşündüyü firmalar arasında ötən il Nobel mükafatı laureatı və müxalifətçi siyasətçi Mariya Korina Maçadonun Venesueladan qaçmasına kömək edən Boz Buğa Xilasetmə Fondu da var.
Keçmiş özəl təhlükəsizlik işçilərindən ibarət şirkətin təsisçisi Brayan Stern deyir ki, onlar regionda "aylardır" fəaliyyət göstərirlər. Potensial variantlardan biri Trampın yaxın adamı Erik Prins tərəfindən təsis edilən “Blackwater”dir.
2007-ci ildə İraqda “Blackwater”döyüşçüləri 17 mülki şəxsi öldürüb, 20 nəfəri yaralayıb. Hadisəyə görə dörd nəfər həbs cəzasına məhkum edilib və şirkət işçiləri daha sonra 2020-ci ildə ABŞ Prezidenti Donald Tramp tərəfindən əfv edilib.
Mənbələr həmçinin vurğulayırlar ki, Prins “Blackwater” əvəzinə Tramp administrasiyası ilə digər əlaqələr vasitəsilə razılığa gələ bilər.
Təhlil göstərir ki, neft şirkətləri təhlükəsizlik zəmanəti olmadan Venesuelaya yenidən investisiya qoymaqda tərəddüd edirlər.
Bildirilir ki, muzdlu şirkətlər Nikolas Maduro rejiminin devrilməsinə qarşı mümkün qisas tədbirləri halında neft ehtiyatlarının qorunmasında mühüm rol oynayacaqlar. Həmçinin bildirilir ki, Karakasdakı repressiyalardan sonra küçələrdə patrul xidməti göstərən "kolectivos" milisləri, eləcə də Kolumbiya İnqilabi Silahlı Qüvvələri (FARC) və Milli Azadlıq Ordusu (ELN) təhlükə yarada bilər.
