Birləşmiş Ərəb Əmirliklərinin (BƏƏ) Ankaradakı səfiri Səid Sani əz-Zahiri Ankara ilə Əbu-Dabi arasında 2023-cü il martın 3-də imzalanan “Hərtərəfli İqtisadi Tərəfdaşlıq Sazişi”nin Türkiyədə 100 min, Əmirliklərdə isə 25 min nəfərə iş yeri açacağını bildirib.
Hafta.az-ın yazdığına görə, səfir Zahiri mətbuat mənsublarına prezident Rəcəb Tayyib Ərdoğanın BƏƏ-yə son səfəri və Ankara ilə Əbu-Dabi münasibətləri ilə bağlı qiymət verib.
Prezident Ərdoğanın BƏƏ-yə son səfərinin hər mənada uğurlu keçdiyini, müxtəlif sahələrdə, xüsusilə də bərpa olunan enerji və hüquqi mövzularda 13 müqavilə imzalandığını bildirən Zahiri, bu il BƏƏ ilə Türkiyə arasında əlaqələrin 50-ci ildönümünün qeyd olunduğunu xatırladıb.
İki ölkə arasında əlaqələrin çox güclü olduğunu vurğulayan Zahiri, Şeyx Zeyid Vəqfinin uşaq müdafiəsi fondunun İstanbulda 40 ildir fəaliyyət göstərdiyini və bunun BƏƏ ilə Türkiyə arasındakı əlaqələrin güclü, dərin və tarixi göstəricisi olduğunu bildirib.
O vurğulayıb ki, son iki ildə Türkiyə ilə BƏƏ arasında liderlər səviyyəsində 5 səfər olub.
Son səfər zamanı müdafiə sənayesi sahəsində müqavilələrin imzalanması ilə bağlı Zahiri bunun yalnız bu sahədə iş görmək istəyi kimi qəbul edilməməsi lazım olduğunu, iki ölkənin ortaq proqramlar, təlim və inkişaf kimi mövzularda addım ata biləcəyini bildirib.
Zahiri hər iki ölkədə müdafiə sənayesi araşdırma mərkəzlərinin olduğunu və gələcəkdə iki mərkəzin də əməkdaşlıq edə biləcəyini diqqətə çatdırıb.
Son görüşdə liderlər arasında strateji inkişaflar olacağına dair siqnallar aldığını qeyd edən səfir, 2020-ci ildə iki ölkə arasında ticarət həcminin 9,8 milyard dollar olduğunu, hazırda isə bunun 19 milyard dollara çatdığını qeyd edib.
Liderlər səviyyəsində edilən səfərlərin iki ölkədəki özəl şirkətlərə də zəmin yaratmağa qadir olduğunu vurğulayan Zahiri, "Birləşmiş Ərəb Əmirliklərinin siyasətlərinin ən mühüm elementləri qarşılıqlı dialoq və ünsiyyət, xüsusilə də strateji yerləşmədir. BƏƏ və Türkiyə coğrafi baxımdan bölgədə çox mühüm rol oynayır, ticarət və investisiyalara zəmin yaradır. Mart ayında imzalanan və sentyabrda qüvvəyə minən “Hərtərəfli İqtisadi Tərəfdaşlıq Sazişi” bunun ən böyük sübutudur" deyib.
Bu son razılaşmanın özəl şirkətlər arasında dialoqları asanlaşdırdığını və gömrük tarifləri ilə bağlı da bir fürsət olacağını qeyd edən Zahiri deyib ki, prezident Ərdoğanın son səfəri zamanı imzalanan razılaşmaların əsas məqsədi iki ölkə arasında investisiyaların 50,7 milyard dollar səviyyəsinə çatdırmaqdır.
Son razılaşmaların özəl şirkətlər və nazirliklər səviyyəsində, xüsusən də investisiya sahəsində davam edən əlaqəni gücləndirmək məqsədi daşıdığını qeyd edən Zahiri qarşıdakı 5 ildə daha yaxşı şeylərin olacağına ümid etdiyini bildirib.
Sentyabrın 1-də qüvvəyə minməsi gözlənilən Hərtərəfli İqtisadi Tərəfdaşlıq Sazişinin iki ölkə arasındakı ticarətə töhfə verəcəyinə işarə edən Zahiri, "İnşallah bu müqavilə 100 mini Türkiyədə, 25 mini BƏƏ də olmaqla, ümumilikdə 125 min adamı məşğulluqla təmin edəcək” deyib.
Prezident Ərdoğanın səfəri zamanı BƏƏ prezidenti Məhəmməd bin Zayed əl-Nahyana TOGG avtomobili hədiyyə etdiyini xatırladan Zahiri, "BƏƏ prezidenti Məhəmməd bin Zayed Ərdoğanın təqdim etdiyi hədiyyədən çox sevindi, avtomobili idarə etdi. O, türk texnologiyasını da çox bəyəndi" deyə bildirib.
Açılışdan əvvəl TOGG fabrikini də ziyarət etdiyini və nəqliyyat vasitəsini sınaqdan keçirdiyini qeyd edən Zahiri, "Səfirlik olaraq yaşıl səfirliyə qayıtmaq üçün səy göstəririk. TOGG da bizim seçimlərimiz arasındadır və inşallah, yaxın gələcəkdə BƏƏ səfirliyi olaraq TOGG şəhərinə köçməyi planlaşdırırıq" ifadələrini işlədib.
BƏƏ ilə investisiya müqavilələri çərçivəsində Türkiyədə müxtəlif aktivlərin alınacağı ilə bağlı iddialara gəlincə, Zahiri bu iddiaların həqiqəti əks etdirmədiyini və prezident Ərdoğanın Türkiyənin maraqlarını çox yaxşı qoruduğunu vurğulayıb.
BƏƏ ilə Türkiyə arasında təkcə sərmayə və iqtisadiyyat sahəsində deyil, həm də sosial müstəvidə əlaqələrin çox güclü olduğunu qeyd edən Zahiri bildirib ki, eyni dinə mənsub iki ölkə xalqı həm də bənzər adət və ənənələri yaşadırlar.
Fevralın 6-da baş verən Kahramanmaraş mərkəzli zəlzələlərdən sonra ölkəsinin Türkiyəyə humanitar yardım etdiyini xatırladan Zahiri BƏƏ-nin bu kədərli hadisədə Türkiyənin yanında olduğunu bildirib.
Səfir bildirib ki, BƏƏ ilə Türkiyə arasında hər iki ölkəyə fayda verəcək qazan-qazan layihələri icra ediləcək.
Prezident Əl-Nahyanla prezident Ərdoğan arasında yaxın dialoqa işarə edən Zahiri, imzalanan sazişlər, nazirliklərarası dialoqlar və özəl sektorun töhfələri ilə Türkiyə ilə BƏƏ arasında ikitərəfli ticarətin inkişaf etdiyini, onların gələcək illərdə daha da güclənəcəyinə əmin olduqlarını vurğulayıb.
Zahiri BƏƏ ilə Türkiyə arasında turizm sahəsində, ikitərəfli əlaqələrə və ticarət sahəsindəki inkişaflara toxunaraq, ötən il ölkəsindən 140 mindən çox turistin Türkiyəyə səfər etdiyini bildirib.
