“Azərbaycandan Qazaxıstana prezident seçkilərini izləmək üçün müşahidəçi missiyası göndəriləcək”.
Hafta.az-ın yazdığına görə, bunu Qazaxıstanın ölkəmizdəki səfiri Serjan Abdıkərimov Qazaxıstanda keçiriləcək prezident seçkilərinə həsr olunmuş mətbuat konfransında deyib.
"Bu müstəqil olduğu dövrdə Qazaxıstanda keçiriləcək sayca 7-ci prezident seçkiləri olacaq. Dövlət başçısı postu uğrunda müxtəlif siyasi baxışlara malik 6 namizəd mübarizə aparır ki, onlardan 2-si qadındır. Çünki Qazaxıstan uzun illərdir gender bərabərliyi üzərində işləyir", - səfir bildirib.
Onun sözlərinə görə, seçkilərə 641 müşahidəçinin gələcəyi gözlənilir ki, onlardan 109-u 35 xarici ölkədən, o cümlədən 8-i Azərbaycandandır.
"Gələn il Qazaxıstanda parlament seçkilərin keçirilməsi gözlənilir. Qarşıdakı dövr Qazaxıstan üçün çox vacibdir, ona görə də biz həm prezident, həm də parlament seçkilərində yüksək fəallığın olacağına ümid edirik", - səfir bildirib.
S.Abdıkarimov Qazaxıstan Prezidenti Kasım-Jomart Tokayevin siyasi islahatlarla bağlı 4 paketi irəli sürdüyünü xatırladıb: "Bura partiyalar üçün qeydiyyat həddinin 20 min nəfərdən 5 min nəfərə endirilməsi, partiyaların seçki siyahılarında qadınlar və gənclər üçün 30 faizlik kvotanın tətbiqi, Konstitusiya Məhkəməsinin bərpası, regionlarda akimlərin seçilməsi üçün alternativ seçkilərin keçirilməsi və sair daxildir".
