Türkiyənin ədliyyə naziri Yılmaz Tunç, Ankarada layihəsi və təməl işləri tamamlanan yeni ədliyyə sarayının təməlinin sentyabrın 19-da keçiriləcək mərasimlə atılacağını deyib. Nazirin sözlərinə görə, ümumi qapalı sahəsi 745900 kvadratmetr olacaq Ankara Ədliyyə Sarayı dünyanın ən böyük ədliyyə sarayı olacaq.
Hafta.az-ın yazdığına görə, hazırda 6 ayrı binada həyata keçirilən məhkəmə xidmətlərinin bir dam altında toplanacağını bildirən Tunç, layihənin Ankarada məhkəmə xidmətlərinin daha səmərəli həyata keçirilməsi baxımından çox əhəmiyyətli bir addım olduğunu qeyd edib.
Nazir Tunç qeyd edib ki, qapalı sahəsi 745900 kvadratmetr olan dünyanın ən böyük ədliyyə sarayı hündür blokların yerinə üfüqi arxitektura ilə tikiləcək, bu da binanın təbii havalandırma və işıqlandırmadan yüksək səviyyədə faydalanmasına imkan yaradacaq.
"Damlarında dizayn edilmiş günəş panelləri ilə bərpa olunan enerjidən istifadə edəcək yeni ədliyyə sarayımız yaşıl bina kimi layihələndirilib. Bu böyük layihə həm vətəndaşlarımız, həm də hüquq müdafiəçiləri üçün məhkəmə xidmətlərinin daha sürətli və effektiv şəkildə göstərilməsini təmin edəcək. Ankara Ədliyyə Sarayı bir binadan daha çox, əlçatanlığı artıran və vətəndaşlarımızın ədalətə çıxışını asanlaşdıran bir mərkəz olacaq. Gələcəyin ehtiyaclarını qarşılamaq üçün nəzərdə tutulub, üfüqi memarlıq yanaşması və bərpa olunan enerji qaynaqlarının istifadəsi davamlılıq hədəflərimizə qatqı təmin edəcək. Ankara Ədliyyə Sarayı yeni dövrün qapısını açacaq müasir strukturu və ekoloji təmiz texnologiyaları ilə ölkəmizin məhkəmə xidmətlərində böyük rol oynayacaq”, - nazir deyib.
