ABŞ tərəfindən maliyyələşdirilən Azad Asiya radiosu (RFA) mətbuat azadlığı və təhlükəsizliklə bağlı artan narahatlıqlar fonunda Honq Konq bürosunu bağlayır.
Hafta.az-ın yazdığına görə, RFA prezidenti Fang deyib ki, onun təşkilatı hakimiyyətin sərt münasibəti və dövlətin tənqidini ağır şəkildə cəzalandıran mübahisəli yeni qanunun qəbulu səbəbindən fəaliyyətini təhlükəsiz şəkildə davam etdirə bilmir.
Mart ayında Honq Konqun Pekin tərəfdarı hökuməti tərəfindən qəbul olunmuş və 2020-ci ildə Çin tərəfindən tətbiqlənən daha geniş milli təhlükəsizlik qanunu əsasında qurulmuş qanuna istinad edərək, Fang açıqlamasında belə deyib: “Honq Konq səlahiyyətlilərinin hərəkətləri, o cümlədən RFA-ya ciddi təzyiqlər, 23-cü maddənin tətbiqi bizim təhlükəsiz fəaliyyət göstərmək qabiliyyətimizlə bağlı ciddi suallar doğurur".
ABŞ Dövlət Departamentinin sözçüsü “RFA-nın qərarı Honq Konq hakimiyyətinin media azadlığına qarşı davam edən basqılarının son nəticəsidir. Milli təhlükəsizlik qanunu və bu yaxınlarda qəbul edilmiş 23-cü maddə qanunvericiliyi çərçivəsində insan hüquqlarının və əsas azadlıqların müdafiəsinin azalması, Honq Konqun muxtariyyətinin sistematik şəkildə ləğvi bizi dərindən narahat edir” deyib.
Honq Konq hökuməti “Reuters”ə verdiyi açıqlamada RFA-nın qərarını şərh etməyəcəyini, lakin "bütün qorxu və qarayaxma bəyanatlarını pislədiyini" bildirib.
Honq Konqun yeni 23-cü maddə qanunu dövlətə xəyanət, üsyan və xarici müdaxilə kimi cinayətlərə görə bir neçə ildən ömürlük həbsə qədər daha sərt cəzalar tətbiq edir.
Qanun məhkəmələrin qapalı keçirilməsinə icazə verir və polisə şübhəliləri heç bir ittiham irəli sürmədən 16 günədək həbsdə saxlamaq hüququ verir.
Son illər Honq Konq mediası dəfələrlə hər cür tənqidi reportajlara görə səlahiyyətlilər tərəfindən hədəfə alınıb.
Mübahisəli milli təhlükəsizlik qanunu 2020-ci ildə qüvvəyə mindiyi üçün hökuməti tənqid edən nəşrləri ilə tanınan iki yerli xəbər təşkilatı – “Apple Daily” və “Stand News”, “Apple Daily”nin naşiri Cimmi Lai də daxil olmaqla, yüksəksəviyyəli rəhbərlərinin həbsindən sonra bağlanmaq məcburiyyətində qalıb.
