Almaniyanın Baş Qərargah rəisi Karsten Breuer və Britaniyanın Baş Qərargah rəisi Riçard Nayton Rusiyanın Ukraynadakı müharibədən dərs çıxararaq yenidən silahlandığını, bunun Avropada müharibə ehtimalını artırdığını vurğuladılar.
Hafta.az yazır ki, Breuer və Nayton “The Guardian” və “Die Welt” qəzetlərində dərc olunmuş məktubun həmmüəllifləridir. Onlar Rusiyanın öz qüvvələrini müharibə riskini artıra biləcək şəkildə yenidən təşkil etdiyini bildiriblər.
Məktubda deyilir: "Rusiya ordusu yenidən silahlanır və Ukraynadakı müharibədən dərs çıxararaq NATO ölkələri ilə münaqişə riskini artıra biləcək şəkildə yenidən təşkil olunur. Moskvanın hərbi güclənməsi, Ukraynada ağrılı şəkildə müşahidə olunduğu kimi, qitəmizdə müharibənin başlama riski ilə birlikdə ehtiyatlılıq tələb edən artan risk yaradır".
Avropanın üzləşdiyi təhdidlərə görə müdafiə və təhlükəsizlik siyasətində təcili dəyişikliyə ehtiyacı olduğunu iddia edən komandirlər, NATO daxilində müdafiə xərclərinin ümumi daxili məhsulun daha yüksək faizinə qədər artırılmalı olduğunu vurğulayıblar. Məktubda silahlanmanın "müharibə təhrikçiliyi" deyil, xalqı və sülhü qorumaq üçün məsuliyyətli bir hərəkət olduğu bildirilir, "Güc təcavüzün qarşısını alır, zəiflik isə onu çağırır" kimi qiymətləndirmə əlavə olunur. Komandanlar hərbi hazırlıq üçün güclü Avropa müdafiə sənayesinə ehtiyac olduğunu vurğulayıblar.
