Britaniyanın ən zəngin ailəsinin dörd üzvü həbs cəzası alıb

11:24 22.06.2024 Müəllif:Hafta.az
Yazını böyüt
Yazını kiçilt

Britaniyanın ən varlı ailəsinin dörd üzvü evlərindəki qulluqçuları istismar etməkdə və icazəsiz işlə təmin etməkdə təqsirli bilinərək həbs cəzası alıblar.

AZƏRTAC xəbər verir ki, bu barədə “Sky News” kanalı məlumat yayıb. Prakaş Hinduca və həyat yoldaşı Kamal, oğulları Ajay və onun həyat yoldaşı Namrata Hinduca Cenevrədə göl kənarındakı villalarında işləyən qulluqçularını istismar etdikləri üçün İsveçrə məhkəməsi tərəfindən cəzalandırılıblar. Onlar hindistanlı işçilərin pasportlarını ələ keçirməkdə, onlara İsveçrə frankı ilə deyil, rupi ilə ödəniş etməkdə, villadan çıxmalarına qadağa qoymaqda və onları uzun müddət işləməyə məcbur etməkdə ittiham olunublar.

Hinduca ailəsi onlara qarşı ittihamlar irəli sürən üç işçi ilə məhkəmədən kənar məxfi razılaşma əldə ediblər. Buna baxmayaraq, məhkəmə ittihamların ağırlığını nəzərə alaraq işi davam etdirmək qərarına gəlib. Nəticədə ailənin üzvləri, dörd il yarımadək həbs cəzasına məhkum ediliblər. Müttəhimlər Cenevrədə məhkəmədən apellyasiya şikayəti verəcəklərini bildiriblər.

Hinduca ailəsi 37 milyard funt sterlinqlik sərvətlə “Sunday Times”ın tərtib etdiyi “Britaniyanın ən zənginləri” siyahısına başçılıq edir.

Oxunma sayı 100