Bu gün Cəbrayılın işğaldan azad olunduğu gündür. Cəbrayılın işğaldan azad olunması və 44 gün ərzində əldə olunan sonrakı uğurlarımız Ermənistan və onların havadarlarına böyük dərs oldu.
Cəbrayılda və işğaldan azad olunmuş rayonlarımızda hərbi qələbə çalan ordumuz, düşmənlə mübarizədə meydanı diplomatik savaşçılara həvalə etməklə bu gün də ayıq-sayıqlığını itirmədən torpaqlarımızın azadlığının təminatçısı kimi öndə dayanır. Cəbrayılın işğaldan azad olunmasının 1 ili dünyaya hansı siyasi, hərbi mesajlarını vermiş oldu?
Bu və ya digər məsələlərlə bağlı hafta.az-a danışan politoloq Firət Sadıqov Azərbaycanın Cəbrayıl istiqamətində əldə etdiyi hərbi qələbənin beynəlxalq siyasi arenada yaratdığı rezonansa diqqət çəkib.
Politoloq bildirib ki, işğalda olan Azərbaycan məntəqələrinin, şəhərlərinin azad olunmasının hərbi, siyasi, strateji əhəmiyyəti var və Cəbrayıl rayonu da istisna deyil.
“Cəbrayılın işğaldan azad olunması o demək idi ki, Azərbaycanın əks-hücum əməliyyatı bir sıra addımları müsbət şəkildə həll olunub. Hər halda dünya ictimaiyyəti, siyasi dairələr başa düşdü ki, biz dayanmayacağıq. Öz torpaqlarımızı azad etmək üçün bütün vasitələrdən istifadə edəcəyik. Cəbrayıl və ondan sonra digər yaşayış məntəqələrini işğaldan təmizləmək və erməni tapdağından azad etməyin dərin siyasi və strateji əhəmiyyəti var. Bunu bir sıra qonşularımız, həm dünya siayasətində Ermənistanla oyun oynayan, həm də başlarını sığallayan dairələr başa düşdü”.
Politoloq bildirib ki, torpaqlar azad ediləndən sonra beynəlxalq güclər, eləcə Ermənistanın özü tərəfindən Azərbaycana qarşı xain, cinayətkar təsirlər oldu. Onun sözlərinə görə, bir çox qüvvələr Azərbaycanın qələbəsini qəbul etmək istəmirlər.
“Həmin o güclər biz toraqlarımızı azad edəndə də müxtəlif bəyanatlar verirdilər. Buna ciddi reaksiya vermirdik. Çünki başa düşürdük ki, biz nə edirik, sağlam düşüncəli siyasətçilər, dövlət xadimləri vəziyyəti dərk edirlər. Hər halda Gəncəyə atılan bombaların törətdiyi dağıntılar və 100- ə yaxın mülki vətəndaşımızın şəhid olması ermənilərin necə vəhşi olduğunu ortaya qoyan əsas faktlar idi. Biz bunu dünyaya yaya bildik. Biz Gəncəyə jurnalistləri, ekspertləti gətirdik. Ordan müsahibələr hazırladıq, mətbuat konfransları keçirildi. Beləliklə biz hərbi, siyasi, strateji və düzgün informasiyanın verilməsi istiqamətində işlərimizi qura bildik. Bu reallığı həm düşmənimiz, həm də onu dəstəkləyən qüvvələr başa düşdü”.
F.Sadıqov deyib ki, dünya Cəbrayılın işğaldan azad olunması reallığını qəbul edib. Çünki sübut elədik ki, uğrunda şəhidlər verdiyimiz o torpaqlar, Cəbrayıl və digər ərazilərimiz bizim torpaqlardır:
“Biz Cəbrayılı azad edib, digər əməliyyatların keçirilməsində uğurlara nail olanadan sonra düşmən oyun oynamadığımızı başa düşdü. Anladı ki, məqsədimiz işğalçını torpaqlarımızdan qovmaqdır. Biz bu məqsədə nail ola bildik. Və Cəbrayıl belə bir strateji nöqtə kimi mühüm rol oynadı.
Biz hazırda meydanda erməni vandallığını göstərən faktlarla, rəqəmlərlə, arqumentlərlə, azad olunan torpaqlara beynəlxalq təşkilatların nümayəndələrini gətirməklə o torpaqların pozulan hüquqlarını bərpa etməliyik. Biz beynəlxalq məhkəmələrə müraciət etmişik. Amma bizim müraciətimiz daha kəskin, hücumedici olmalıdır. Biz dayanmadan bu istiqamətdə işləməliyik. Əsas məqsədimiz odur ki, dünya nəhayət hansı vandalizmlə üzləşdiyimizi başa düşsün. Düzdür, düşmənlərimiz bu faktları görsə də göz yumacaq. Amma digər tərəfdən tərəfdarlarımız da çoxalacaq. Bəlkə də bunu görməyənlər görəcək. Biz bu işi kampaniya şəklində yox, düşünülmüş və planlı şəkildə etməliyik. Burada hüquqşünasların da rolu çox böyükdür. Əgər işğal, teror faktları məhkəməyə çıxarılacaqsa bizə kifayət qədər dəlillər lazımdır. İşğaldan azad olunmuş ərazilərdə filmlər çəkməli, şəkillər çəkməli, müsahibələr almalı və dünya ictimaiyyətinə çatdırmalıyıq. Bu istiqamətdə xaricdəki səfirliklərimiz xüsusilə çalışmalıdır. Səfirliklərin prioritet işi bundan ibarətdir. Çünki Cəbrayıl hərbi yolla azad edilib və indi onun haqqının bərpası istiqamətində diplomatik savaş daha sərt şəkildə davam etməlidir”.
