13-15 fevral tarixlərində Dubayda “Gələcəyin Hökumətlərini Formalaşdırmaq” şüarı altında 2023-cü il Dünya Hökuməti Sammiti keçiriləcək.
Hafta.az-ın Birləşmiş ərəb Əmirliklərinin (BƏƏ) rəsmi xəbər agentliyi olan WAM-a istinadən yazdığına görə, sammitdə dövlət və hökumət başçıları, nazirlər, rəsmi şəxslər, beynəlxalq təşkilat və şirkətlərin rəhbərləri, düşüncə mərkəzlərinin liderləri, qlobal ekspertlər və özəl sektorun tanınmış biznes rəhbərləri iştirak edəcək.
Dubaydakı Gələcək Muzeyində keçirdiyi mətbuat konfransında WGS öz gündəliyini, əsas mövzularını və forumlarını açıqlayıb.
BƏƏ Nazirlər Kabinetinin İşlər Naziri və Dünya Hökumət Zirvəsi (WGS) Təşkilatının rəhbəri Məhəmməd bin Abdullah əl-Gerqavi deyib ki, WGS-nin 2023-cü il Zirvəsində Misir prezidenti Əbdülfəttah əl-Sisi, Türkiyə prezidenti Rəcəb Tayyib Ərdoğan, Seneqal prezidenti, eləcə də Afrika İttifaqının rəhbəri Macki Sall, Paraqvay prezidenti Mario Abdo Benites və Azərbaycan prezidenti İlham Əliyev başda olmaqla, 20 dövlət başçısı iştirak edəcək.
Əl-Gerqavi qeyd edib ki, builki tədbir dünyanın hər yerindən 250-dən çox nazir və 10 mindən artıq hökumət rəsmisi, düşüncə mərkəzlərinin liderləri və qlobal ekspertləri bir araya gətirəcək, 80-dən çox beynəlxalq, regional və hökumət təşkilatı sessiya və forumları zənginləşdirəcək.
Sessiyalarda BMT Baş katibi ilə Dünya Bankı rəhbərinin çıxışı ilə yanaşı, Dünya İqtisadi Forumunun təsisçisi və baş icraçı direktoru, professor Klaus Şvab, Beynəlxalq Valyuta Fondunun baş direktoru Kristalina Georgiyeva, Ümumdünya Ticarət Təşkilatının Baş Direktoru Nqozi Okonjo-İveala, Ümumdünya Səhiyyə Təşkilatının Baş direktoru Dr. Tedros Adhanom Febreyesus, Ərəb Liqasının Baş Katibi Əhməd Aboul Gheyt, İslam İnkişaf Bankının (İİB) prezidenti Məhəmməd Sulayman əl-Casser, Körfəz Ərəb Dövlətləri Əməkdaşlıq Şurasının (GCC) baş katibi Casem əl-Budayvi, eləcə də Beynəlxalq Maliyyə Korporasiyasının (IFC) baş meneceri və baş direktorun müavini, Beynəlxalq Atom Enerjisi Agentliyinin, Beynəlxalq Əmək Təşkilatının təmsilçisi də iştirak edəcək.
"Bridgewater Associates"in təsisçisi, həm-prezidenti və baş investisiya direktoru Rey Dalio, "Guggenheim Partners"in baş direktoru Alan Şvarts, "Rakuten Inc"in təsisçisi və baş direktoru Hiroşi Mikitani, "Siemens Energy"nin prezidenti və baş icraçı direktoru Kristian Bruç kimi özəl sektorun liderləri də tədbirə rəng qatacaqlar.
Sammitdə həmçinin Nobel mükafatlı iqtisadçı Ester Duflo və kimyaçı alim Rocer Kornberq də daxil olmaqla bir qrup alim iştirak edəcək.
Gündəliyə dünyanın hər yerindən düşüncə liderlərindən, qlobal ekspertlərdən və qərar qəbul edənlərdən 300-dən çox məruzəçinin baxışlarını bölüşəcəyi, gələcək üçün ideya və strategiyaları müzakirə edəcəyi 220-dən çox sessiya daxildir.
Sammit 80-dən çox strateji, informasiya və media tərəfdaşları ilə əməkdaşlıq edib və bu il ən mühüm beynəlxalq tədqiqat institutları ilə birgə 20 informasiya hesabatı dərc edib.
Sammitin açılışnda nitq söyləyəcək Ali Şuranın üzvü, Ras Əl-Xeymə əmiri Şeyx Səud bin Saqr əl-Qasimi əmirliyin hədəflərini açıqlayacaq, müxtəlif sektorlarda inkişaf müstəvisindəki təcrübələr və gələcək üçün əsas aspektlər nəzərdən keçirəcək "Rəs Əl-Xeymə: keçmiş, bu gün və gələcək" adlı dialoqa ev sahibliyi edəcək.
Baş nazirin müavini və daxili işlər naziri, general-leytenant Şeyx Saif bin Zayed əl-Nəhyan da WGS-də əsas sessiyada çıxış edəcək.
WGS 2023 ClimateTech Forumu, Qida Sisteminin Transformasiyası Forumu, Qlobal Sağlamlıq Forumu, SDGs in Fəaliyyət Forumu, Hökumət Xidmətləri Forumu, Hökumətdə Qadınlar Forumu, Sənaye və Yüksək Texnologiyalar Forumu və Hökumətin Gələcəyi Media Forumu vasitəsilə həyati əhəmiyyətli sektorlarda müxtəlif dialoqlarını davam etdirir.
Sammit zamanı Beynəlxalq Valyuta Fondu direktorunun iştirakı ilə ərəb maliyyə nazirlərinin və Ərəb Dövlətləri Liqası baş katibinin iştirakı ilə ərəb gənclər nazirlərinin görüşü kimi yüksək səviyyəli tədbirlər keçiriləcək.
WGS 2023, inkişafın və idarəetmənin sürətləndirilməsi, icmaların və səhiyyənin gələcəyi, sərhədlərin tədqiqi, iqtisadi dayanıqlığın və bağlantının idarə edilməsi, qlobal şəhər dizaynı və davamlılığı, öyrənmə və işin prioritetləşdirilməsi daxil olmaqla, 6 əsas mövzuda bir sıra interaktiv dialoq sessiyalarına ev sahibliyi edəcək.
WGS-nin hazırkı versiyası hökumət işinin və gələcək siyasət və strategiyanın inkişafına töhfə verən müxtəlif həyati sektorlarda ən mühüm qlobal tendensiyaların müzakirəsinə yönəlmiş bir sıra beynəlxalq forum və dialoqları özündə cəmləyəcək.
Forumlar dünyanın üzləşdiyi çağırışlara yeni həll yolları yaratmaqda maraqlı olan bir sıra beynəlxalq təşkilatlar, texnoloji təşkilatlar, aparıcı şirkətlər və sosial təşkilatlarla əməkdaşlıq çərçivəsində təşkil olunur.
WGS-nin builki sessiyasının bir hissəsi olaraq, bəşəriyyət üçün daha yaxşı bir cəmiyyətin qurulmasında görkəmli töhfələrinə görə nazirlərə, özəl sektor nümayəndələrinə, yenilikçilərə və yaradıcılara verilən 7 qlobal mükafat təqdim ediləcək.
