“Quranın yandırılması cinayəti nifrətdən qaynaqlanan təxribatçı hərəkətdir. Digər tərəfdən, ağılsız reaksiyalara da yol vermək olmaz. Təbii ki, bu mərc son nəticədə İslamı və müsəlmanları çökdürmək məqsədi daşıyır. Lakin bu bədxahların özlərinəməxsus əxlaqi və insani lüğətləri yoxdur. Başqalarının namusuna, xüsusən də mömin olaraq bizim üçün ən dəyərli olan şeylərə, yəni dini simvollarımıza hörmət etməyi bilmirlər”.
Hafta.az-ın yazdığına görə, bunu Dünya İslam Birliyinin baş katibi Şeyx Məhəmməd əl-İsa “Şarkul Avsat”a müsahibəsində deyib. Əl-İsanın sözlərinə görə, ola bilsin ki, bu cinayətkarlar məhz davranışlarına uyğun tərbiyə olunublar, ya da gizli niyyətli tərəflər tərəfindən hazırlanıblar, amma əsas danışılası məsələ onlara verilən rəsmi icazədir.
“İfadə azadlığı prinsip və dəyərlər əsasında qurulmalıdır. Bu xaotik azadlıqlar düşmənçilik və nifrət yaymaq, xüsusən də münaqişə və sivilizasiyalararası qarşıdurma alovunu alovlandırmaq üçün istifadə oluna bildiyi halda, bəzi ölkələr azadlıqların qorunması ilə necə fəxr edə bilər? Bu gün dünya xalqları arasında körpülərin qurulmasının vacibliyini hayqırarkən, rəsmi qalxanlarla qorunmaqla Quran kitabını yandırıb cinayət törədirlər və deyirlər ki, “sizin nifrət və kin aşılamağa haqqınız, münaqişələri alovlandırmaq üçün təhrik etmək hüququnuz var. Bütün bunları edərkən, mənim himayəm altında təhlükəsizsən”. Azadlıq prinsipi qeyd-şərtsiz olmamalıdır” deyən Şeyx Məhəmməd əl-İsa əlavə edib ki, həmin cinayətkarlara Quranı yandırmağa icazə verənlər üçün də azadlığın keçməməli olduğu qırmızı xətlər var. Ancaq dini müqəddəslərə, xüsusən də İslam müqəddəslərinə gəlincə, bunlar aradan qalxır. Dini müqəddəs yerlərə hörmət milli müxtəlif cəmiyyətlərin harmoniyasının, hətta dünya sülhünün mühüm sütunudur.
Cənab əl-İsa bildirib ki, dünyamızın sülh içində yaşaması üçün insanlar bir-birinə hörmət etməlidirlər. Mübahisəli məsələlər xoşagəlməzdir və bu normaldır, amma hörmət ləyaqətlə bağlıdır.
“Təxmin edə bilərsiniz ki, tarixi münaqişələrin əksəriyyətinin dini mənşəyi var və biz “Din böyük, həssas və təhlükəli bir məsələdir” deyirik. Ona görə də dini müqəddəs şeylərə çox ehtiyatla yanaşmaq lazımdır. Araşdırdıqda görə bilərsiniz ki, müasir dünyada ən təhlükəli münaqişələrin kökündə məhz din dayanır. Məsələn, Avropada “Otuz illik müharibə” dini qarşıdurma ilə başladı. Səlib yürüşləri dəsırf dini şüar daşıyırdı” deyən əl-İsanın sözlərinə görə, lakin bu zülmün səbəbkarları tarixə diqqət etsələr, sonda ziyana uğrayanların özləri olduğunu görəcəklər. Müharibə ilə bərabər onlar öz ləyaqətlərini əbədi itirəcəklər. Təqib rüsvayçılığı, namusun təhqiri və təxribatçı əməllər onların ardınca gələcək.
“Bəzi seçkilərdə, xüsusən də ifrat sağçılar təbii ki, öz kampaniyalarını dəstəkləmək üçün dini mövzulara diqqət yetirirlər. Daha sonra bundan doğan fəsadların, xüsusilə dini kimliyin qızışdırılması ilə milli birliyin sabitliyinin itirilməsinin şahidi oluruq. Bu mövzuda sözümü Quranın Allahın kəlamı olduğunu, ona heç kimin zərər verə bilməyəcəyini və Quranın Allah tərəfindən qorunduğunu deməklə bitirmək istəyirəm. Halbuki Quranın bir nüsxəsini yandıranlar yalnız əllərinə keçəni yandırırlar. Nə qədər ki, onları qoruyan konstitusiyalar var, onların bu cinayəti törətməsinin qarşısını almaq mümkün deyil. Amma biz müsəlmanlar bu iyrənc cinayətə qəzəbimizi şiddətlə ifadə etməli və ən böyük nifrət cinayətlərindən biri kimi tanıdığımız bu mənfur təhqirə dərin qəzəbimizi sülh yolu ilə bildirmək üçün əlimizdən gələni etməliyik”, - deyib Dünya İslam Birliyinin baş katibi.
